Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 91 Hüküm no: 29 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zafire bt. Yorgi ile Fotini bt. Petko’nun aralarındaki alacak davasında anlaştıkları Sulh. Mahrûse-i Galata’da Sultan Bayezid Mahallesi mütemekkinelerinden Zafire bt. Yorgi nâm Nasrâniye ba‘de’t-ta‘rîfi’ş-şer‘î meclis-i şer‘-i hatîr-i lâzımü’t-tevkīrde bâ‘isetü hâzihi’l-vesîka Fotini bt. Petko nâm Nasrâniye muvâcehesinde ikrâr-ı tâm ve takrîr-i kelâm edip mezbûre Fotini Nasrâniyeye bundan akdem yedi sene hizmet etmemle sinîn-i mezbûrede olan ecr-i mislimi mezbûre Fotini’den taleb ve da‘vâ sadedinde olduğumda beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezbûremden beni mezbûre Fotini ile on beş guruş üzerine sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on beş guruşu yedinden tamamen ahz u kabz eylediğimden sonra ücret-i mezbûreye ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimizi âharı ibrâ ve iskāt edip min-ba‘d birbirimiz ile kat‘â da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 24 Safer sene [1]143. Şuhûdü’l-hâl: Mehmed Çelebi b. Abdullah, diğer Mehmed Çelebi b. Abdullah, diğer Mehmed Çelebi b. Ahmed, İbrahim b. Mustafa, Abdullah Çelebi b. Mustafa, Mustafa b. Hasan.