Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 91 Hüküm no: 30 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed’in Çukurbostan Mahallesi’ndeki bahçesini kızı Ârife’ye sattığı Mübâya‘a-i bahçe. Mahmiye-i İstanbul’da Sultan Selim kurbünde Çukurbostan Mahallesi ahâlîsinden Ahmed Çelebi b. Mehmed nâm kimesne meclis-i şer‘-i şerîf-i enverde sulbiye kebîre kızı bâ‘isetü hâzihi’l-vesîka Ârife bt. el-mezbûr Ahmed b. Mehmed nâm hatunun zevci ve tarafından husûs-ı âti’z-zikri tasdîka vekîl olduğu zât-ı mezbûreyi bi’l-mu‘arrefeti’ş-şer‘iyye ârifân olan Mehmed Çelebi b. Abdullah ve Receb b. Bayram nâm kimesneler şehâdetleri ile sâbit olan Hasan Çelebi b. Mehmed mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan kızım müvekkile-i mezbûre ile vekîl-i mezbûr Hasan Çelebi mülkleri ve iki tarafdan benim âhar menzilim ve bir tarafdan tarîk-i hâs ile mahdûd altmış altı zirâ‘ eşcâr-ı müsmire ve gayr-ı müsmireli bahçemi tarafeynden îcâb ve kabûlü hâvî bey‘-i bâtt-ı sahîh-i şer‘î ile kızım müvekkile-i mezbûre Ârife’ye kırk guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr kırk guruşu kızım müvekkile-i mezbûre yedinden tamamen ahz u kabzeyledim. Fîmâ-ba‘d bahçe-i mahdûd-ı mezbûre kızım müvekkile-i mezbûrenin mülk ve müşterâsı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 24 Safer sene [1]143. Şuhûdü’l-hâl: Ömer Beşe b. Yusuf, es-Seyyid İbrahim b. es-Seyyid Mahmud, Mehmed Beşe b. Mehmed, İbrahim Çelebi b. Mehmed, Ömer Çelebi b. Mehmed.