Üsküdar Mahkemesi 51 numaları sicil (H. 987-988/ M. 1579-1580) cilt: 8, sayfa: 150 Hüküm no: 223 Orijinal metin no: [27a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Paşa vakfına ait dükkânda içki satılmasının yasaklanması Vech-i tahrîr-i hurûf oldur ki Nefs-i Üsküdar’da imâreti olan merhûm Mehmed Paşa’nın hâlâ mütevellîsi olan fahrü’l-akrân Abdurrahman Çelebi b. Veli Hamza Fakīh mahallesinden Hacı Behrâm b. Abdullah mahzarında ikrâr ve i‘tirâf kılıp vakf-ı mezbûrdan bir tarafı Sinan Paşa hazretleri vakfıyla ve bir tarafı tarîk-i âmla ve bir tarafı Yusuf dükkânıyla ve bir tarafı Yani nâm zimmî dükkânıyla mahdûd olan dükkân mezbûr Yani’nin tasarrufunda olup ve lâkin dükkânda hamr bey‘ etmekle etrâfında olan müslümanlar müte’ezzî ve mutazarrır olup ref‘i lâzım olmağın mezbûr Behrâm’dan bin akçe ücret-i mu‘accele alıp ayda yirmi beşer akçe icâreye verdim dedikde bilesince hâzır olup evlâd-ı vâkıfdan vakfa nâzır olan Mehmed Çelebi b. Abdülhalîm ben dahi izin verdim dedikde mezkûr Behrâm mukırrân-ı merkūmânı vicâhen tasdîk ettikten sonra Hacı Mustafa b. Şaban ve Yusuf b. Bâli ve Nuh b. Çalabverdi ve Receb b. Ümmet nâm kimesneler fi’l-vâki‘ mezbûr dükkânda hamr satar ref‘i lâzımdır deyû haber verdiklerinde mâ hüve’l-vâki‘ bi’t-taleb sebt olundu. Şuhûdü’l-hâl: Nezir b. Behrâm et-tabbâh, Ali Bâli b. Sinan, Nebi Halîfe b. Hasan, Hüseyin b. Behrâm, Nasûh b. Hamza ve Mehmed b. Behrâm el-muhzırân, za‘îm ve el-mezkûrûn