Üsküdar Mahkemesi 51 numaları sicil (H. 987-988/ M. 1579-1580) cilt: 8, sayfa: 151 Hüküm no: 224 Orijinal metin no: [27a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dâvudlu ve Ökümce köylerinin vergilerinin İbrahim b. Sarı’ya mukâtaaya verildiği Üsküdar za‘îmi olan Mehmed Bey meclis-i şer‘- i şerîfde işbu bâ‘isü’l-hurûf İbrahim b. Sarı Mehmed muvâcehesinde ikrâr edip ve Üsküdar ze‘âmeti tevâbi‘inden Taşköprü nâhiyesinde Dâvudlu ve Ökümce nâm karyelerin a‘şâr-ı şer‘iyye ve rüsûm-ı örfiyyesini ve bi’l-cümle mâ tekaddemden mîrîye âid ve râci‘ olan her ne ise sâhibi fevt olup tasarrufu mahlûl olan arzın bey‘inden mâ‘adâ seksen yedi senesinde hâsıl olan der-anbar mahsûl mezbûr İbrahim’in anbarında dâhil olup seksen sekiz senesinde hâsıl olacak mahsûl dahi benim olup bundan mâ‘adâ ne hâsıl olur ise târih-i kitâbdan sene tamâmına varınca mezbûr İbrahim’e ber vech-i maktû‘ beş bin akçeye verdim târih-i kitâbdan üçüncü ay tamâmında meblağ-ı merkūmu bana teslîm etmek şartı ile dedikde mukırr-ı mezbûrun kelâm-ı meşrûhun mezkûr İbrahim vicâhen tasdîk ve karye-i mezkûrenin vech-i meşrûh üzre mukāta‘ası[nı] iltizâm ve kabûl edip ve meblağ-ı merkūma Fazlı Çelebi b. Mustafa ve Mustafa b. Kulu kefîl olup mâ cerâ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mehmed b. Behrâm, Bâkī Çelebi b. Hızır, Eymir Halîfe b. Hasan el-imâm, Hasan b. Veliyüddin, İlyas b. Mehmed, Mehmed b. İbrahim el-baytâr