Üsküdar Mahkemesi 51 numaları sicil (H. 987-988/ M. 1579-1580) cilt: 8, sayfa: 151 Hüküm no: 225 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli Bey b. Yakub’u dövüp, elbise ve paralarını çalanların bulunması Üsküdar mahallâtından Kefçe mahallesinde sâkin Bâli Bey b. Yakub nâm sipâhîyi ba‘zı kimesneler dövüp ve sâhib-i firâş etmeğin üzerine varılıp keyfiyyet-i hâl görülmesin taleb olunduğu ecilden zeyl-i kitâbda mastûr olan müslimîn ile üzerine varılıp görüldükde fi’l-vâki‘ mezbûr Bâli muhkem darb olunup sâhib-i firâş olduğu muhakkak olup keyfiyyet-i hâl tefahhus olundukda mezbûr Bâli işbu Kasım b. Cafer ve Hasan b. Abdullah ve Veli b. Yusuf nâm kimesneler mahzarında takrîr-i da‘vâ edip dün gece nısfü’l-leylden sonra Ehlice-zâde Ahmed Çelebi’yi Karacaahmed zâviyesine varınca gönderi gidip Hacı Paşa binâ ettiği fırın önüne geldiğimde beş altı kimesne yoluma çıkıp kürkümü ve tülbentimi ve cebimden bir guruş ile on altı akçemi alıp beni muhkem dövüp kimisi boğazıma yapışıp ve kimisi döverek beni Uzun Musalli nâm kimesnenin ahırına koymak isteyip Muhammed ümmeti deyû feryâd ettiğimde Mustafa Paşa oğlu Osman Bey’in evinde icâre ile sâkin Mahmud Bey kapıyı açıp beni gördükde kapıyı kapayıp içeri gitti ba‘dehu ardınca beni soyanlar dahi zikr olunan eve girdiler dedikde sâlifü’z-zikr Mahmud Bey’e hizmet eden mezbûr Kasım’dan keyfiyyet-i hâl istintâk olundukda ikrâr ve i‘tirâf edip fi’l-vâki‘ ol gece Arab Ahmed oğlunun harbendesi ve Mahmud Bey’in mezbûr Hasan nâm abd-i memlûkü ve Veli b. Yusuf nâm hizmetkârı ile sâlifü’z-zikr Mahmud Bey’in atları olduğu Uzun Musalli ahırında şürb-i hamr eder iken mezbûrân Hasan ve hareminden taşra çıkıp dahi <> mezbûr Hasan’ı[n] ferâcesin ve mezbûr harbende dahi tülbentin aldıkda feryâdlarına ben dahi taşra çıkıp mezbûr harbendeden tülbentin alıverdim ve bi’l-cümle keyfiyyet-i şerr ile ne işlediğimiz bilmeziz dedikde mezbûr Veli dahi hâl mesfûr Kasım’ın takrîr[i] gibidir deyû cevâb verip ve mezbûr Hasan’dan suâl olundukda ikrâr edip vech-i meşrûh üzre şürb-i hamr eder iken mezbûr Kasım ve harbende mukaddemâ çıkıp tülbentin ve kürkün aldılar idi ben sonra hengâmelerine vardım dedikde mâ cerâ bi’t-taleb ketb olundu. Şuhûdü’l-hâl: Kenan Çelebi b. Sinan, Derviş b. Hüseyin, Sinan Bey b. Abdullah, Mahmud b. Abdi [Yevm]ü’l-hamîs Fî 17 Zilhicce seneti minhu.