Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 120 Hüküm no: 73 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia b. Hasan’ın evinin yarı hissesini eşi Mehmed Çelebi b. Mustafa’ya sattığı Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mustafa Efendi b. el-merhûm Yunus Efendi mahmiye-i İstanbul’da Aydınkethüdâ Mahallesi’nde sâkine Râbia bt. Hasan nâm hatunun menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf ettikde zâtı Ebûbekir Ağa b. el-Hâc İbrahim ve es-Seyyid el-Hâc Hasan Ağa b. es-Seyyid Derviş ta‘rîfleriyle mu‘arrefe olan mezbûre Râbia Hatun meclis-i ma‘kūd-ı mezkûrda zevci bâ‘isü hâze’l-kitâb Mehmed Çelebi b. Mustafa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Bektaş bt. Abdullah nâm hatun mülkü ve bir tarafdan Ömer Çelebi tasarrufunda olan vakıf menzil ve bir tarafdan tarîk-i hâs ve bir tarafdan tarîk-i âm ile mahdûd fevkānî iki oda ve bir sofa ve tahtânî iki oda ve bir sofa ve bodrum ve bi’r-i mâ ve bahçeyi muhtevî işbu akd-i meclis-i şer‘ olunan menzilin nısf-ı şâyi‘ini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz guruşa zevcim mezbûr Mehmed Çelebi’ye bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr iki yüz guruş mütâlebesinden zevcim mezbûrun zimmetini ibrâ-i âmm-ı râfi‘u’l-hısâm ile ibrâ ve iskāt eyledim min-ba‘d menzil-i mahdûd-ı mezkûrun nısf-ı şâyi‘i zevcim mezbûr Mehmed Çelebi’nin mülk-i müşterâsıdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Abdullah Çelebi b. Mustafa ve Salih b. Ali ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 Rebî‘ülevvel sene [1]143. Şuhûdü’l-hâl: Ebûbekir Ağa b. el-Hâc İbrahim, es-Seyyid el-Hâc Hasan Ağa b. es-Seyyid Derviş, Mehmed Çelebi b. el-Hâc İbrahim, Ali Beşe b. Mehmed, Abdullah Çelebi b. Mustafa, Salih b. Ali, Ali Çelebi b. Osman.