Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 119 Hüküm no: 72 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mitre bt. Oseb’in babasından intikal eden evdeki hissesini kardeşi Baryam’a sattığı Fi’l-asl vilâyet-i Anadolu’da medîne-i Kayseriye kazâsına tâbi‘ Tavas nâm karyede sâkin iken bundan akdem hâlik olan Oseb v. Marat’ın verâseti zevce-i metrûkesi Nazlı bt. Ağabalı nâm Nasrâniye ile sulbiye kebîr oğulları Baryam ve Misail ve Şahin ile sulbiye kebîre kızları Mitre ve Menekşe nâm Nasrâniyelere münhasıra ba‘dehû mezbûre Nazlı dahi hâlik olup verâseti sadrî kebîr oğulları mezbûrûn Baryam ve Misail ve Şahin ile sadriye kebîre kızları mezbûretân Mitre ve Menekşe’ye münhasıra ve tashîh-i mes’elesi bi-tarîkı’l-münâsahati’ş-şer‘iyye altmış dört sehmden olup sihâm-ı mezbûrdan on altışar sehmi oğulları mezbûrûn Baryam ve Misail ve Şahin’den her birine ve sekizer sehm kızları mezbûretân Mitre ve Menekşe’den her birine isâbet eylediği muhakkak oldukdan sonra zâtı Uğurlu v. Baryam ve Oseb v. Amen nâm zimmîler ta‘rîfleriyle mu‘arrefe olan mezbûre Mitre meclis-i şer‘-i şerîf-i enverde li-ebeveyn er karındaşı işbu râfi‘u’s-sifr merkūm Baryam muvâcehesinde ikrâr ve takrîr-i kelâm edip babamız hâlik-i mezbûrdan müntakil olup karye-i mezbûrede vâki‘ iki tarafdan Muslihiddin nâm kimse menzili ve bir tarafdan İmâm Enbiya Efendi menzili ve bir tarafdan tarîk-i âm ile mahdûd menzilden tashîh-i mezkûr üzere bana isâbet eden sekiz sehm hisse-i irsiyyemi tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi guruşa karındaşım merkūm Baryam’a bey‘ ve temlîk ve mahallinde zabt ve tasarrufa taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yirmi guruşu karındaşım merkūm Baryam yedinden tamamen ahz u kabzeyledim ba‘de’l-yevm menzil-i mahdûd-ı mezbûrdan bana isâbet eden sekiz sehm hisse-i irsiyyem karındaşım merkūm Baryam’ın mülk-i müşterâsı olup kat‘â benim alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 Rebî‘ülevvel sene [1]143. Şuhûdü’l-hâl: El-hâc İbrahim b. ( ), Abbas Beşe nakkāş, Ahmed Beşe nakkāş, Halil Beşe b. Ahmed, el-Hâc Yusuf b. ( ), Uğurlu v. Emirza, Aci Kosta v. Kostantin, Aslan v. Oseb, Baryam b. Yahşi.