Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 122 Hüküm no: 75 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirişçi Ali Çelebi b. Hüseyin’in evini Debbağ Kara el-Hâc Mehmed Vakfı’na sattığı Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘den irsâl olunan başkâtibimiz Mevlânâ Mustafa Efendi b. el-merhûm Yunus Efendi Mahmiye-i İstanbul’da Alifakih Mahallesi’nde sâkin Kirişçi Ali Çelebi b. Hüseyin’in menziline varıp zeyl-i rakīmde mektûbü’l-esâmî Müslimîn mahzarlarında akd-i meclis-i şer‘-i şerîf ettikde mezbûr Ali Çelebi meclis-i ma‘kūd-ı mezkûrda merhûm Debbâğ Kara el-Hâc Mehmed nâm sâhibü’l-hayrın nukūd-ı mevkūfesine meşrûtiyyet üzere bi’l-fi‘il mütevellî olan bâ‘isü hâze’l-kitâb el-Hâc Mustafa Efendi b. Hasan mahzarında ikrâr ve takrîr-i kelâm edip vâkıf-ı mezbûr vakfiye-i ma‘mûlün-bihâsında nukūd-ı mevkūfe-i mezkûresini akāra tebdîli şart eylediği ecilden akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Abdülfettâh Dede veresesi ve bir tarafdan Emine Hatun ve bir tarafdan Mehmed Çelebi mülkleri ve bir tarafdan tarîk-i âm ile mahdûd fevkānî bir oda ve tahtânî bir oda ve sofa ve bodrum ve bi’r-i mâ ve bir mikdâr bahçe ve kenîfi muhtevî mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile vakf-ı mezbûra akār için mütevellî-i mezbûr el-Hâc Mustafa Efendi’ye yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm edip semeni olan meblağ-ı mezbûr yüz elli guruşu nukūd-ı mezkûreden olmak üzere mütevellî-i mezbûr yedinden tamamen ahz u kabz eyledim min-ba‘d menzil-i mahdûd-ı mezkûr vakf-ı mezbûr müstegallâtından olup kat‘â benim alâkam kalmadı emsâli gibi mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan [15a] Abdünnebi b. Nuh ve Salih b. Ali ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 Rebî‘ülevvel sene [1]143. Şuhûdü’l-hâl: El-hâc Mehmed Ağa b. el-Hâc Abdullah, el-Hâc Süleyman b. Mehmed, İsmail Çelebi b. Hüseyin, Hasan Çelebi b. Ahmed, Molla Ahmed b. el-Hâc Mehmed, Ali Çelebi b. Receb, Ahmed Çelebi b. Abdullah, Mehmed Çelebi b. İbrahim, Debbâğ el-Hâc İsmail b. Osman, es-Seyyid Mehmed Çelebi b. es-Seyyid Osman, es-Seyyid Ahmed Çelebi b. Mustafa, Osman Efendi b. Musa, Hüseyin Çelebi b. Mehmed, Ahmed Çelebi b. Mehmed, Molla Ömer b. Mustafa, Ömer Çelebi b. Hüseyin, Hasan Beşe b. Mehmed.