Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 123 Hüküm no: 76 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Receb’in boşandığı kocası Hüseyin Beşe b. Abdullah üzerine açtığı mehir davasında haksız olduğu Mahrûse-i Galata’ya tâbi‘ kasaba-i Tophane mahallâtından Yazıcı Mahallesi sâkinelerinden olup zâtı ta‘rîf-i şer‘î [ile] mu‘arrefe olan Emine bt. Receb nâm hatun meclis-i şer‘-i şerîf-i enverde zevc-i mutallıkı işbu râfi‘u’l-kitâb Hüseyin Beşe b. Abdullah mahzarında üzerine da‘vâ ve takrîr-i kelâm edip mezbûr Hüseyin Beşe zevcim olup târih-i kitâbdan dokuz ay mukaddem beni tatlîk etmekle zimmetinde mütekarrir ve ma‘kūdun-aleyh iki bin beş yüz seksen akçe mehr-i müeccelim bâkī kalmağla taleb eylediğimde edâdan imtinâ‘ eder suâl olunup bana edâya mezbûr Hüseyin Beşe’ye tenbîh olunmak matlûbumdur dedikde gıbbe’s-suâl mezbûr Hüseyin Beşe cevâbında fi’l-hakīka müdde‘iyye-i mezbûre Emine zevce-i menkûhası olup târih-i kitâbdan dokuz ay mukaddem tatlîk eylediğini ikrâr lâkin mehr-i müeccel-i mezbûr ancak bin beş yüz akçe olup meblağ-ı mezbûr bin beş yüz akçeyi dahi li-ebeveyn er karındaşı işbu hâzır bi’l-meclis Mehmed’in gāib ani’l-meclis İplikçi Mehmed Bey nâm kimesneye cihet-i deyn-i şer‘îden on dört guruş deyni olmağın üçümüz bir meclisde hâzır olduğumuz hâlde havâle-i sahîha-i şer‘iyye ile üzerime havâle eyledikde ben dahi havâle-i mezbûreyi ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharı ibrâ-i âm ile ibrâ ve iskāt etmişidik deyü def‘le mukābele edicek müdde‘iyye-i mezbûre Emine dahi kaziyye zevci mezbûr Hüseyin Beşe’nin takrîr eylediği vech üzere olduğunu ikrâr u i‘tirâf etmeğin mûcebince müdde‘iyye-i mezbûre bî-vech mu‘ârazadan men‘-birle mâ-hüve’l-vâki‘ bi’t-taleb ketb olundu. Fî 27 Safer sene [1]143. Şuhûdü’l-hâl: Mehmed b. Abdullah, İbrahim b. Mustafa, Abdullah b. Mustafa, İbrahim b. Hüseyin, Ali b. Abdullah, Salih b. Süleyman, Mustafa b. Hasan, Hüseyin b. el-Hâc Mehmed.