Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 151 Hüküm no: 109 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed ile kocası Ramazan Beşe b. İbrahim’in muhala‘a yoluyla boşandıkları Muhâla‘a. Mahmiye-i İstanbul’da Manisalı Çelebi mahalle sâkinelerinden olup zâtı Mehmed Halîfe b. Abdullah ve Na‘lband Hasan Beşe b. Mehmed nâm kimesneler ta‘rîfleriyle mu‘arrefe olan Fâtıma bt. Mehmed nâm hatun meclis-i şer‘-i hatîr-i lâzımü’t-tevkīrde râfi‘u’l-vesîka sâbıkā ehl-i hibre serdârı Ramazan Beşe b. İbrahim b. Abdurrahman tarafından husûs-ı âti’l-beyâna vekîl olduğu mu‘arrifân-ı mezbûrân şehâdetleriyle şer‘an sâbit olan mahalle-i mezbûre müezzini es-Seyyid Ali Halîfe b. es-Seyyid Mehmed nâm kimesne mahzarında takrîr-i kelâm ve bast-ı merâm edip mezbûr Serdâr Ramazan Beşe zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh iki bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a olduğumda ol dahi bi’l-vekâle ba‘de’l-kabûl hukūk-ı zevciyyete müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Rebî‘ülâhir sene [1]143. Şuhûdü’l-hâl: Mehmed Bey b. Süleyman, es-Seyyid Mehmed b. Receb, Mehmed Bey b. Ali, Mustafa Çelebi b. Şa‘ban, es-Seyyid Mehmed Beşe b. es-Seyyid İbrahim, Mehmed Beşe b. Ali, İbrahim Beşe b. Mustafa, Ahmed b. Mustafa.