Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 152 Hüküm no: 111 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası İbrahim b. Ahmed’ten boşanan Emetullah bt. Hüseyin’in yanındaki çocuğu için nafaka tayini Mâ-fîhi mine’l-farz ve’t-takdîr ( ) sadara mine’l-fakīr ilâ-rabbi’l-kadîr Mustafa el-müvellâ hilâfeten bi-medîneti Kostantıniyye el-mahmiyye gufira leh Mahmiye-i İstanbul’da Koğacı Dede Mahallesi sâkinelerinden olup zâtı ta‘rîf-i şer‘î ile mu‘arrefe olan işbu râfi‘atü’l-kitâb Emetullah bt. Hüseyin nâm hatun meclis-i şer‘-i şerîf-i enverde zevc-i sâbıkı İbrahim b. Ahmed nâm kimesne mahzarında takrîr-i kelâm ve bast-ı merâm edip mezbûr İbrahim’in firâşından hâsıl ve benden mütevellid hâlâ bi-hakkı’l-hıdâne hacr ve terbiyemde işbu Mustafa nâm sagīrin nafaka ve kisveye ihtiyâcı olmağla babası mezbûr İbrahim üzerine kıbel-i şer‘den kadr-i kifâye nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûr Mustafa’nın nafaka ve kisvesi’çün babası merkūm İbrahim üzerine tarafeynin rızâsıyla târih-i kitâbdan beher yevm ikişer para farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisvesi’çün harc ve sarfa ve lede’l-iktizâ istidâneye ve inde’z-zafer babası merkūm İbrahim üzerine rücû‘a mezbûre Emetullah Hatun’a izin verilmeğin mâ-vaka‘a bi’t-taleb ketb olundu. Fî 13 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Abdullah b. Mustafa, İbrahim b. Mustafa, Ahmed b. Hasan.