Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 152 Hüküm no: 112 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Hüseyin ile eşi İbrahim b. Ahmed muhala‘a yoluyla boşandıkları El-emru hasbemâ-hurrire fîh nemekahü’l-fakīr ileyhi azze şânühu Mustafa el-müvellâ hilâfeten bi-medîneti Kostantıniyye el-mahmiyye. Gufira-leh Mahmiye-i İstanbul’da Koğacı Dede Mahallesi sâkinelerinden olup zâtı Ahmed Çelebi b. Hasan ve İbrahim b. Mustafa nâm kimesneler ta‘rîfleriyle mu‘arrefe olan Emetullah bt. Hüseyin nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb İbrahim b. Ahmed nâm kimesne mahzarında ikrâr ve takrîr-i kelâm edip mezbûr İbrahim zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine kendiye medfû‘um olan beş guruş bedel-i hul‘ olup meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 13 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Abdullah b. Mustafa, İbrahim b. Mustafa, Ahmed b. Hasan.