Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 161 Hüküm no: 124 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zafir bt. Nikola’ın kocası Anadol’un öldüğünü şahitlerle ispat ettiği İstihbâr. Mahmiye-i İstanbul’da Çakırağa Mahallesi mütemekkinelerinden bâ‘isetü hâze’s-sifr Zafir bt. Nikola nâm Nasrâniyeden ber-vech-i âtî istihbâr-ı şer‘î sudûrundan sonra zât-ı mezbûreyi bi’l-mu‘arrefeti’ş-şer‘iyye ârifân mahalle-i mezbûre mütemekkinlerinden Nikola v. Aslan ve Kiryako v. Anaştaş nâm zimmîler li-ecli’l-istihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Zafir Nasrâniyenin zevci Anadol v. Teryaki v. Andon târih-i kitâbdan bir sene mukaddem mahrûse-i Galata’da Aya Nikola Mahallesi’nde hasta olup bi-emri’llâhi te‘âlâ mürd oldukda lâşesini ilkā-i türâb eyledik deyü ihbâr etmeleriyle hıfzan li’l-makāl mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-şehri Rebî‘ülâhir sene 1143. Şuhûdü’l-hâl: Mehmed Ağa b. Mehmed Ağa, diğer Mehmed Ağa b. Abdullah, İbrahim b. Mustafa, Salih Çelebi b. Süleyman, Mehmed b. Ahmed Duhânî.