Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 160 Hüküm no: 123 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Ali’nin vefât eden eşi Mustafa b. Abdülgani’nin Mehmed b. Abdülkerim’e olan borcunu ödediği Türkmen tâifesinin Pehlivanlı cemâ‘atinden olup mahrûse-i Üsküdar’da vâki‘ Kavukçu Hânı demekle ma‘rûf hânda müsâfiren sâkin Mehmed b. Abdülkerim nâm kimesne meclis-i şer‘-i şerîf-i enverde bundan akdem vefât eden Mustafa b. Abdülganî b. Abdullah nâm müteveffânın verâseti zevce-i menkûha-i metrûkesi Hanife bt. Ali nâm hatun ile sulbî sagīr oğlu Ali’ye münhasıra ba‘dehû sagīr-i mezbûr Ali dahi vefât etmeğin verâseti vâlidesi mezbûre Hanife’ye münhasıra olmağla müteveffâ-i mezbûrun tereke-i vâfiyesine bi’l-verâse vâzı‘atü’l-yed olan işbu bâ‘isetü’l-vesîka mezbûre Hanife Hatun mahzarında üzerine da‘vâ ve takrîr-i kelâm edip târih-i kitâbdan iki sene mukaddem vilâyet-i Anadolu’da Balıkesrî kasabasında vâki‘ hânda bin iki yüz elli guruş müteveffâ-i mezbûr Mustafa’ya hayâtında mâlımdan ikrâr [ikrâz] ve teslîm ol dahi ber-vech-i muharrer yedimden iktirâz ve tesellüm ve mesârifine sarfla istihlâk eyledikden sonra mezbûr Mustafa kable’l-edâ vefât etmeğin mezbûre Hanife Hatun’a suâl olunup meblağ-ı mezbûru müteveffâ-i merkūmun tereke-i vâfiyesinden bana edâ ve teslîme tenbîh olunması matlûbumdur dedikde gıbbe’s-suâl mezbûre Hanife Hatun cevâbında fi’l-hakīka müteveffâ-i mezbûrun tereke-i vâfiyesinde ber-vech-i muharrer bi’l-verâse vaz‘-ı yedini ikrâr lâkin deyn-i mezkûru inkâr edicek müdde‘î-i mezbûrdan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve fi’l-asl zikr olunan Balıkesrî kasabası ahâlîsinden olup Mahmiye-i İstanbul’da Küçük Karaman’da müsâfiren sâkin es-Seyyid İbrahim b. Osman ve Süleyman b. Ahmed ve Mustafa Beşe b. Ahmed ve Ali Beşe b. Hüseyin nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka müdde‘î-i mezbûr Mehmed târih-i kitâbdan iki sene mukaddem vilâyet-i Anadolu’da mârru’z-zikr Balıkesrî kasabasında vâki‘ hânda işbu mezbûre Hanife’nın zevci müteveffâ-i mezbûr Mustafa b. Abdülganî b. Abdullah’a hayâtında mâlından bin iki yüz elli guruş bizim huzûrumuzda ikrâz ve teslîm ol dahi ber-vech-i muharrer iktirâz ve tesellüm ve mesârifine sarfla istihlâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri şer‘an makbûle olup müdde‘î-i mezbûr Mehmed tahlîf-i şer‘î ile ba‘de’t-tahlîf mûcebince meblağ-ı mezbûr bin iki yüz elli guruşu müteveffâ-i mezbûrun tereke-i vâfiyesinden müdde‘î-i mezbûr Mehmed’e edâ ve teslîme mezbûre Hanife Hatun’a ba‘de’t-tenbîh müdde‘î-i mezbûr Mehmed meclis-i şer‘de mezbûre Hanife Hatun mahzarında ikrâr ve takrîr-i kelâm edip ânifen edâsına tenbîh olunan meblağ-ı mezbûr bin iki yüz elli guruşu müteveffâ-i mezbûrun tereke-i vâfiyesinden olmak üzere Hanife Hatun yedinden bi’t-tamam ahz u kabzeyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 Rebî‘ülâhir sene [1]143. Şuhûdü’l-hâl: Hasan Efendi b. Mahmud, Hüseyin Ağa b. Mustafa, Himmet b. Abdullah, Mustafa b. el-Hâc Abdurrahman, İsmail b. Ahmed Efendi, İsazâde Ahmed Efendi b. Ahmed Efendi, Salih b. Süleyman, Mehmed Çelebi b. Abdullah, Mustafa b. el-Hâc Hüseyin.