Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 162 Hüküm no: 126 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacı Mehmed Ağa’nın İskenderpaşa Mahallesi’ndeki evini Bosnalı Mustafa Ağa’ya sattığı Mübâya‘a hücceti 1.300 guruş. Mahmiye-i İstanbul’da İskenderpaşa Mahallesi ahâlîsinden Çorbacı Mehmed Ağa b. Mehmed nâm kimesne meclis-i şer‘-i şerîf-i enverde Dergâh-ı âlî yeniçerilerinin otuzuncu bölük çorbacısı olan işbu bâ‘isü’l-kitâb Bosnevî Mustafa Ağa b. Murad nâm kimesnenin tarafından husûs-ı âti’l-beyânı tasdîka vekîl olan es-Seyyid Halil Çelebi b. Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Abdullah Çelebi menzili ve bir tarafdan Ahmed Çelebi menzili ve iki tarafdan tarîk-i âm ile mahdûd hâriciyyesinde fevkānî bir bâb oda ve bir sofa ve tahtânî bir bâb oda ve bir kenîf ve bir bi’r-i mâ ve bir ahır ve bir mikdâr havlu ve dâhiliyesinde fevkānî üç bâb oda ve bir sofa ve dehlîz ve bir matbah ve tahtânî bir matbah ve bir kenîf ve bir bi’r-i mâ ve bahçe ve bir mikdâr havluyu müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr Bosnevî Mustafa Ağa’ya bin üç yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr bin üç yüz guruşu müvekkil-i mezbûr Mustafa Ağa yedinden tamamen ahz u kabzeyledim fîmâ ba‘d menzil-i mahdûd-ı mezkûrda kat‘â benim alâka ve medhalim kalmayıp müvekkil-i mezbûr Mustafa Ağa’nın mülk-i müşterâsı ve hakk-ı sırfı olmuşdur. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min-şehri Rebî‘ülâhir sene 1143. Şuhûdü’l-hâl: Ahmed Efendi b. Halil, Hüseyin Efendi b. Receb, Hasan Çelebi b. Ali, Mustafa Çelebi b. Hüseyin, Osman Ağa b. Ahmed, diğer Osman b. Mehmed, el-Hâc Ahmed b. Ramazan, Ahmed b. Mehmed, es-Seyyid Mehmed b. Yusuf, Halil b. İbrahim, Receb b. Ramazan, Mustafa b. Hüseyin, Mustafa b. Resul.