Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 163 Hüküm no: 127 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merâmî el-Hâc Ahmed Efendi’nin yeniçeri çorbacılarından Mehmed Ağa’ya sattığı ev konusunda herhangi bir dava açmayacağı İstîfâdan ibrâ. Mahmiye-i İstanbul’da Müftî Aliçelebi Mahallesi sâkinlerinden olup Dergâh-ı âlî -dâme mahfûfen bi’l-me‘âlî- yeniçerilerinin ikinci bölüğe mahsûs odanın bi’l-fi‘il çorbacısı olan fahrü’l-akrân Mehmed Ağa b. Ramazan nâm kimesne meclis-i şer‘-i hatîr-i lâzımü’t-tevkīrde Mahmiye-i mezbûrede bi’l-fi‘il Mâliye tezkirecisi umdetü erbâbi’t-tahrîr ve’l-kalem zübdetü ashâbü’t-tastîr ve’r-rakam bâ‘isetü’l-vesîka Merâmî el-Hâc Ahmed Efendi b. İvaz b. Abdurrahman tarafından husûs-ı âti’z-zikri tasdîka vekîl olduğu Molla Abdürrahim b. Salih Efendi ve Mustafa Çelebi b. Mehmed nâm kimesneler şehâdetleriyle sâbit olan Molla Mehmed b. Hasan nâm kimesne mahzarında ikrâr-ı tâm ve takrîr-i kelâm edip arsasının senede merhûm Abdülbâki nâm sâhibü’l-hayrın vakfına yedi yüz yirmi akçe mukāta‘ası ve ebniyesi bâ-izn-i mütevellî müvekkil-i mûmâ-ileyh Merâmî el-Hâc Ahmed Efendi’nin yedinde mülk ve hakkı olan mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât menzilini bi-cümleti’t-tevâbi‘ ve’l-levâhık bey‘-i kat‘î ile iki bin yedi yüz elli guruşa bundan akdem bana bey‘ ve temlîk ve teslîm arsasını dahi bâ-ma‘rifet-i mütevellî ferağ ve tefvîz etmekle semeni olan meblağ-ı mezbûr iki bin yedi yüz elli guruşu yedinden [yedimden] tamamen ahz u kabz ve mesârifime [mesârifine] sarfla istihlâk etmişidi. El-hâletü hâzihî zikr olunan bey‘ ve ferağın gabn u tağrîr ve adem-i istîfâsına müte‘allika âmme-i de‘âvî ve kâffe-i mütâlebâtdan ben müvekkil-i mûmâ-ileyh Merâmî el-Hâc Ahmed Efendi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledikden sonra vech-i meşrûh üzere benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 Rebî‘ülâhir sene [1]143. Şuhûdü’l-hâl: Salih Efendi b. Mehmed Efendi, Molla Abdürrahim b. Salih, Molla İbrahim b. Salih el-müezzin, Mustafa Çelebi b. Mehmed, Osman b. Mehmed, Mehmed b. Osman.