Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 185 Hüküm no: 154 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın hür olduğuna dair eline belge verildiği Mahmiye-i İstanbul’da Hamamcı Muhyiddin Mahallesi’nde sâkin iken bundan akdem vefât eden Süleyman Odabaşı b. Osman b. Sefer’in verâseti zevce-i metrûkesi Âişe bt. Sefer nâm hatun ile li-ebeveyn er karındaşı Halil’e münhasıra idiği şer‘an müte‘ayyin oldukdan sonra müteveffâ-i mezbûr hayâtında kendiye rıkkını mu‘terife olan uzun boylu, çatık kaşlı, kara gözlü Acemiyyetü’l-asl Müslimetü’l-mille işbu bâ‘isetü’l-vesîka Hadice bt. Abdullah meclis-i şer‘-i şerîf-i enverde mezbûrân Âişe ve Halil mahzarlarında ikrâr ve takrîr-i kelâm edip müteveffâ-i mezbûr fevtinden sekiz gün mukaddem hayâtında beni mâlından tedbîr-i mutlak ile lede’ş-şuhûd müdebber eylediğini bundan akdem mezbûrân Âişe ve Halil muvâcehelerinde şuhûd-ı udûlle isbât eylediğimden sonra müteveffâ-i mezbûrun terekesinin sülüsünü kınnen kıymetimin sülüsânına müsâ‘id olmayıp şer‘an si‘âyet lâzım gelmekle mezbûr Halil kendi hissesinde ıtkımı mücîz ve mezbûre Âişe dahi rub‘ hissesi [32b] mukābelesinde mâlından on beş guruş verip beni tahrîr ve ıtâk etmişidi hâlâ işbu mezbûrândan suâl olunup takrîrleri tahrîr ve kıbel-i şer‘den yedime vesîka verilmek matlûbumdur dedikde mezbûrân Halil ve Âişe fi’l-vâki‘ hâl bâlâda tafsîl ü beyân olunduğu vech üzeredir deyü mukırre-i mezbûreyi bi’l-cümle kelimât-ı meşrûhasında bi’l-muvâcehe tasdîk ve tahkīk etmeğin mukırre-i mezbûre Hadice sâir harâir-i asliyyât gibi hürre olup üzerinde hakk-ı velâdan gayrı nesne kalmamağın mâ-vaka‘a bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: İmâm Abdullah Efendi b. Ali, Müezzin Mustafa Halîfe b. Ali, el-Hâc Mahmud b. Mustafa, Abdulkādir Beşe b. İbrahim, Hasan Çelebi b. İbrahim, Ahmed Çelebi b. Mehmed, Yusuf Beşe b. Hamza, Hüseyin b. Ali.