Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 184 Hüküm no: 153 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Beşe b. Mustafa’nın eşi Eylence Fâtıma bt. Abdullah’tan irsen intikal eden ev hissesini Mehmed Ağa b. Hüseyin’e sattığı Mübâya‘a. Mahmiye-i İstanbul’da Kazasker Mehmedefendi Mahallesi’nde sâkine iken bundan akdem vefât eden Eylence Fâtıma bt. Abdullah b. Abdurrahman atîka-i Koca Yusuf Efendi nâm hatunun verâseti zevc-i metrûku Abdi Beşe b. Mustafa ile usûbet-i sebebiye cihetinden mevlânâ-yı utâka oğlu Abdullah Efendi b. el-mezbûr Koca Yusuf Efendi’ye münhasıra ve terekesinin nısfı zevci mezbûra ve nısfı bâkīsi mezbûr Abdullah Efendi’ye isâbet ve intikālı müte‘ayyin oldukdan sonra mezbûr Abdi Beşe meclis-i şer‘-i şerîf-i enverde bâ‘isü hâze’l-kitâb Mehmed Ağa b. Hüseyin mahzarında ikrâr ve takrîr-i kelâm edip mahalle-i mezbûrede vâki‘ iki tarafdan mezbûr Mehmed Ağa mülkü ve bir tarafdan Berberzâde İsmail Çelebi mülkü ve bir tarafdan tarîk-i âm ile mahdûd fevkānî iki bâb oda ve bir sofa ve dehlîz ve bir tahtânî oda ve bi’r-i mâ ve kenîf ve bir mikdâr bahçeyi muhtevî mülk menzilin nısf-ı şâyi‘i Âişe Hatun bt. Musa mülkü ve nısf-ı şâyi‘-i âharı müteveffât-ı mezbûre Eylence Fâtıma Hatun’un hayâtında yedinde mülkü olup ba‘de’l-vefâtihâ nısfı irsen bana ve nısf-ı bâkīsi ber-vech-i muharrer asabesi mezbûr Abdullah Efendi’ye irsen isâbet etmeğin menzil-i mezkûrdan ber-vech-i muharrer bana isâbet eden nısf-ı şâyi‘-i mezkûru cümle tevâbi‘ ve levâhık ve kâffe-i menâfi‘ ve merâfıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa mezbûr Mehmed Ağa’ya bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruşu yedinden tamamen ahz u kabz eyledim min-ba‘d menzil-i mezkûrdan bâlâda merkūm nısf-ı şâyi‘i merkūm Mehmed Ağa’nın mülk-i müşterâsı olup kat‘â benim alâka ve medhalim kalmadı. Keyfemâ-yeşâ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: Mustafa Ağa b. Ebûbekir, Hasan Efendi b. ( ) el-imâm, Hüseyin Odabaşı 57. c[emâ‘at], Kasab Hüseyin Beşe, Yedekçizâde Ahmed Çelebi b. Mehmed.