Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 186 Hüküm no: 156 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melike bt. Kutlu’nun bazı eşyalarını kız kardeşi Ezmarağda ve onun kızı Domline bt. Kostantin’e sattığı Mahmiye-i İstanbul’da Mirâhor Mahallesi’nde sâkine Melike bt. Kutlu nâm Nasrâniye zâtı ba‘de’t-ta‘rîfi’ş-şer‘î meclis-i şer‘-i şerîf-i enverde kız karındaşı işbu bâ‘isetü’s-sifr Ezmarağda nâm Nasrâniye muvâcehesinde ikrâr-ı tâm ve takrîr-i kelâm edip bey‘-i âti’z-zikrin sudûruna değin yedimde mülk ve hakkım olan eşyâ-i memlûkemden mecmû‘u iki bin yedi yüz akçe kıymetli iki minder ve bir yemenî yorgan ve dört yemenî yastık ve bir beledî döşek ve bir Yanbolu kebesi ve bir köhne sincab kürk ve bir köhne orta keçesi ve bir leğen ma‘a ibrik ve bir tencere ve üç sahan ve bir Mısır hasırımı meblağ-ı mezbûr iki bin yedi yüz akçeye tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile safka-i vâhide ile bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semenleri olan iki bin yedi yüz akçe mütâlebesinden kız karındaşım mezbûre Ezmarağda’nın zimmetini ibrâ-i âm ile ibrâ ve iskāt eyledim ba‘de’l-yevm eşyâ-i muharrere-i mezkûre karındaşım merkūme Ezmarağda’nın mülk-i müşterâsı olup kat‘â benim alâka ve medhalim kalmamışdır. Keyfemâ-teşâ mutasarrıf olsun dedikde gıbbe’t-tasdîkı’ş-şer‘î yine mezbûre Melike Nasrâniye meclis-i şer‘de kız karındaşı kızı Domline bt. Kostantin nâm Nasrâniye tarafından husûs-ı âti’z-zikri tasdîka vekîl-i şer‘îsi olan anası merkūme Ezmarağda muvâcehesinde ikrâr-ı tâm ve takrîr-i kelâm edip bey‘-i âti’z-zikrin sudûruna değin yedimde mülk ve hakkım olan eşyâ-i memlûkemden kırk guruş kıymetli bir tek altın bilezik ve on guruş kıymetli bir incili kuşak ve yirmi guruş kıymetli askılık inci ve on guruş kıymetli on aded inci düğmemi bin yüz kırk bir senesinde vâki‘ Zilka‘desi’nin on sekizinci günü tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūme Domline’ye seksen guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semen-i mezkûr seksen guruşun altmış guruşunu müvekkile mezbûre Domline yedinden târih-i merkūmda ahz u kabz ve mâ‘adâ yirmi guruşa müte‘allika âmme-i da‘vâdan müvekkile-i merkūme Domline’nin zimmetini ibrâ-i âm ile ibrâ ve iskāt edip fîmâ-ba‘d zikri mürûr eden eşyâda kat‘â alâka ve medhalim kalmayıp müvekkile-i mezkûre Domline’nin mülk-i müşterâsı olmuşdur. Keyfemâ-teşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ li-sene selâse ve erba‘în ve mi’e ve elf. Şuhûdü’l-hâl: Ali Efendi b. İbrahim vekîl-i imâm, es-Seyyid Abdullah Efendi b. Abdülkerim el-müezzin, Mustafa Efendi b. İbrahim el-müezzin, es-Seyyid Hâfız Abdullah Efendi b. Mehmed Efendi, Ahmed Beşe b. Ömer, Mehmed Çelebi b. Ahmed, Mustafa Çelebi b. Mehmed, Lefter v. Yuvan, Yuvan v. Zolab, Dolet v. Aleksan.