Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 187 Hüküm no: 157 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Nehabet’in Tırnovi ahalisinden Hasan ve es-Seyyid Hüseyin’den alacağı olduğunun şahitlerle ispatlandığı Tahmîl-i şehâdet. Mahmiye-i İstanbul’da Alipaşa Mahallesi ahâlîsinden Ebûbekir Çelebi b. İsmail b. Abdullah ve Ahmed Çelebi b. Hasan b. Abdullah nâm kimesneler meclis-i şer‘-i şerîf-i enverde Mehmed b. Mustafa ve Ahmed b. Abdurrahman ve Hasan Çelebi b. Ebûbekir ve Nasır b. Abdullah nâm kimesneler mahzarlarında her biri takrîr-i kelâm ve tâ‘bir ani’l-merâm edip işbu sarraf tâifesinden Nehabet v. Gabril v. Serkiz nâm Ermeni vilâyet-i Rumeli’nde medîne-i Yenişehr-i Fener nevâhîsinden Tırnovi ahâlîsinden Hasan b. ( ) ve es-Seyyid Hüseyin b. ( ) nâm kimesnelere ber-mûceb-i temessük mâlından iki bin yedi yüz yetmiş altı guruş bizim huzûrumuzda ikrâz ve teslîm eylediğinde onlar dahi ber-vech-i muharrer iktirâz ve tesellüm ve mesâriflerine sarfla istihlâk edip meblağ-ı mezkûr mezbûrân Hasan ve es-Seyyid Hüseyin’in cihet-i karzdan mezbûr Sarraf Nehabet’e deynleri olduğuna şâhidleriz şehâdet dahi ederiz lâkin bizim için medîne-i mezkûreye varıp edâ-yı şehâdet-i şer‘iyye etmek müte‘assir olmağın bizim lisânımızdan husûs-ı mezkûre şâhidler olun ve mahallinde edâ-yı şehâdet-i şer‘iyye edin deyü ber-vech-i muharrer <<şehâdetleri>> şehâdetimizi mezbûrûndan her birine tahmîl eylediğimizde onlar dahi tahammül ve ber-minvâl-i muharrer edâ-yı şehâdet-i şer‘iyye etmek üzere her biri ta‘ahhüd eyledi dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Salih Çelebi b. Süleyman.