Üsküdar Mahkemesi 56 Numaralı Sicil (H.990-991/M. 1582-1583) cilt: 9, sayfa: 202 Hüküm no: 428 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahalle sakinlerinin evinde yaralı olarak yatan Hüseyin b. Abdullah’ın durumunun araştırılmasını istemeleri Oldur ki Mahalle-i Ma‘mûre sâkinlerinden Nebi Sofu ve Pîr Ahmed ve Topçu Mehmed ve Yakub b. Abdullah ve sâiri mahfil-i kazâda hâzırûn olup takrîr-i merâm edip, mahalle-i mezbûrede sâkin komşumuz Hüseyin b. Abdullah nâm kimesne mecrûh evinde yatıyor üzerine varılıp keyfiyyet-i ahvâli tefahhus olunup alâ vukû‘ihî sebt-i sicil olmasın taleb ederiz dediklerinde, zeyl-i sicilde mastûr müslümanlar ile üzerine varılıp kaziyye kendüden istintâk olundukda cevâb verip karye-i İstavros yolunda Piyâle Paşa çayırında Yoros kazâsına tâbi‘ Sırapınarı nâm karyeden İbrahim nâm arabacı ve yanınca bir yoldaşı lâ ya‘kıl sarhoş Duka v. Mihal nâm zimmîyi tutup muhkem let vurup hattâ boğazlamak kasdın edip mezbûr zimmî bre hay deyû feryâd edip ben dahi orada bulunup mezbûru halâs için üzerlerine varıp bre neylersiniz kan eylediniz dediğimde, anı koyup benim üzerime yürüyüp balta ile sağ kolumu omzum başında vurup mecrûh edip ve dirseğime gelince kemiklerimi hurd eylediler zahmım onlardandır ehl-i mahalleden bir ferdin günâhı yokdur dedikde mâ vaka‘a bi’t-taleb kayd-ı sicil olundu. Tahrîren fî evâsıt-ı Şevvâli’l-mükerrem sene 991. Şuhûdü’l-hâl: Usta Memi el-Cerrâh, Keyvan b. Abdullah, Mehmed b. Abdullah, Ramazan el-Muhzır