Üsküdar Mahkemesi 56 Numaralı Sicil (H.990-991/M. 1582-1583) cilt: 9, sayfa: 206 Hüküm no: 440 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahtolum bt. İkbalat’ın satın aldığı evle ilgili kocası Hasan b. Hâce’nin her hangi bir davasının olmadığı Mahalle-i Ma‘mûre’de sâkin Tatar tâ’ifesinden Hasan b. Hâce mahfil-i kazâda bâ‘isetü’s-sicil zevcesi Ahtolum bt. İkbâlât tarafından tasdîke vekîl olup Mustafa b. Allahverdi ve Allahverdi b. Yusuf şehâdetleri ile vekâleti sâbit olan Mehmed b. Nikleş muvâcehesinde takrîr-i kelâm edip, mezkûrun müvekkilesi olan zevcetim mezkûrenin bundan esbak mahalle-i merkūmede iştirâ ettiği menzilde benim dahi hakkım vardır deyû mezkûre ile da‘vâ ve nizâ‘ etmiş idim. Hâlâ zikr olunan da‘vâdan rücû‘ edip hâne-i merkūmda min ba‘d medhalim yokdur. Mezbûre Ahtolum’un mülk-i müşterâsıdır içinde bir akçe ve bir habbe hakkım olmayıp vechen mine’l-vücûh iştirâkim yokdur müstakillen mülküdür eğer da‘vâ edersem inde’l-hükkâm mesmû‘ olmaya dedikde, mukarrun lehâ’l-mezbûre cânibinden vekîl-i merkūm Mehmed mukırr-ı mezkûru bi’l-muvâcehe tasdîk edip mâ vaka‘a bi’t-taleb kayd olundu. Tahrîren fî târihi mezbûr. Şuhûdü’l-hâl: Mehmed b. İsâ, Aydın b. Hâce, Ali b. Hüseyin, Yusuf b. Abdullah, Ramazan el-Muhzır.