Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 93 Hüküm no: 1 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. İstefanoz’un Yorgo v. Manol’a ait evi, izinsiz kullanması Yorgo v. Manol nâm zimmî mahfil-i şer‘-i şerîfde Yani v. İstefanoz nâm zimmî mahzarında takrîr-i da‘vâ kılıp karye-i (…) ve bir tarafı tarîk-i âm ile mahdûd olan bir evimi fuzûlî tasarruf eder taleb ederim deyip mezbûr Yani’ye suâl olundukda mezbûr Yorgo’nun vekîlinden satın aldım deyip mezbûr Yorgo ben kimesneyi mezbûr evimi satıver deyu vekîl eylemedim deyip mezbûr Yani nice günler vekîl edip vekîlden satın aldığına beyyine ityânına âciz olup karye-i mezbûre ahâlîsinden Payanor ve Yorgo, Papaz Amir Kosta, Yani v. Mihal Todor ve Kostantin ve İstemad nâm zimmîler ve gayrılar mezbûr ev mezbûr Yorgo’nun mülküdür karyemiz içinden mezbûr Yani’nin vekîlinden satın aldığın bilir bir kimesne yokdur tezvîr ve telbîs işittik ki mezbûr Yorgo kimesneyi kefîl eylemiş ol vekîlin deyu mezbûre bey‘ eylemiş deyu cevâb eylediklerinde mezbûr Yorgo’ya vekîl eylemediğine yemîn verilip ol dahi yemîn eylemeğin mezbûr ev mezbûr Yorgo’ya hükm olundu. Fî evâili Rebî‘ilâhir sene elf. Şuhûdü’l-hâl: Muttalib b. Süleyman, Mustafa b. Mehmed, Mehmed b. Ahmed, Behrâm b. Mehmed, el-Hâc Sefer b. Abdullah, Behrâm Yayabaşı b. Haydar Ağa, ve gayruhüm