Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 93 Hüküm no: 2 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Bey’in, Osman Çavuş b. Abdülmüsteân’a emânet bıraktığı kölenin kaçtığı Kasaba-i Midilli sükkânından olup ebnâ-i sipâhiyândan yüz altmış beşincide fahrü’l-akrân Davud Bey b. Abdülmennân nâm sipâhi meclis-i âlî-i kadr ve mahfil-i me‘âlî-i sadrda Dergâh-ı âlî çavuşlarından kıdvetü’l-emâsil ve’l-akrân Osman Çavuş b. Abdülmüste‘ân mahzarında da‘vâ edip târih-i kitâbdan dört yıl mukaddem Reşid nâm mevzi‘de Porteviyyü’l-asl Bilâl nâm Arab’ı üç bin akçeye iştirâ edip kasaba-i mezbûreye gelip altı aydan sonra bize koyup Gence seferi ne gidip mezbûr Bilâl ibâk eylemiş hâlâ mezbûrun yedinde buldum taleb ederim deyicek mezbûr Osman Çavuş’dan suâl olundukda târih-i kitâbdan altı ay mukaddem Mustafa Reis nâm kimesneden üç bin akçeye iştirâ eyledim deyu cevâb vericek işbu hâzır bi’l-meclis olan mezbûr Bilâl’dan kazıyye bi’l-muvâcehe suâl olundukda fi’l-vâki‘ ben merkūm Davud Bey’in abd-i müşterâsıyım kendi Gence seferine gidip beni mersûm reis ayartıp getirip mûmâileyh Osman Çavuş’a üç bin akçeye bey‘ eyledi deyicek müdde‘î-i mezbûrun da‘vâsına muvâfık beyyine taleb olundukda kasaba-i mezkûreden olup ebnâ-i sipâhiyândan Mustafa b. Abdullah ve Rüstem Bey b. Abdülmüste‘ân nâm kimesneler hâzırân olup fi’l-hakīka mezbûr Bilâl mûmâileyh Davud Bey’in abd-i memlûkü kasaba-i mezbûrede merkūm Bilâl’i koyup altı aydan sonra Gence seferine gittikde ibâk eylemiş deyu şehâdet eylediklerinde ba‘de’t-ta‘dîl ve’t-tezkiye hayyiz-i kabûlde vâki‘ olup mûcebiyle hükm olundu. Hurrire fî evâili Rebî‘ilâhir sene elf. Şuhûdü’l-hâl: İlyas Bey b. Abdullah el-cündî, Mehmed b. Yunus, Hüseyin b. Behrâm, Kasım b. Ahmed, Mehmed b. Ali, Mehmed b. Behrâm, Ahmed b. Habîb, Mehmed b. Osman, Behrâm Subaşı, Müstedâm Bey, Kâtibü’l-hurûf Mustafa