Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 117 Hüküm no: 54 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti Hâtun bt. Mustafa’nın câriyelerini kandırdığı iddiasıyla Attâr Hüsrev b. Abdullah’a açtığı davadan vazgeçtiği Budur ki Bursa sükkânından Sitti Hâtun bt. Hasan mahfil-i kazâda Attâr Hüsrev b. Abdullah nâm kimesne mahzarında bast-ı kelâm edip bundan akdem Ruhsânî nâm câriyemi Sâime ve Safiye nâm avretler ayartıp mezbûrun evine götürüp ba‘dehû mezbûre Ruhsânî nâm câriyemi mezbûretân avretleri buluver deyu da‘vâ eylemiş idim ve mezbûretân avretleri benim Zamâne nâm câriyemi dahi ayartmış idi ol câriyemi Tüfenkçi odasında buldum mezbûr Hüsrev’in câriyesi husûsuna müte‘allik cemî‘ da‘vâdan zimmetine ibrâ-i âmm ile ibrâ’ ve ıskāt eyledim husûs-ı mezbûra müte‘allik da‘vâ ve nizâ‘ sâdır olursa benden veya vekîlimden da‘vâ sâdır olursa inde’ş-şer‘ makbûl olmaya deyicek mukırr-ı mezbûrun kelâmına mukarran lehü’l-mezbûr vicâhen tasdîk edicek gıbbe’t-taleb kayd-ı sicil olundu. Hurrire fi’t-târihi’l-mezbûr. Şuhûdü’l-hâl: Ali Çelebi b. Mahmud el-imâm, Mevlânâ Ahmed Çelebi el-müderris, Ahmed Bey b. Abdullah el-cündî, Fazlı Çelebi b. Ferhad, Cafer b. Hasan, Kirişçi Mehmed b. Ömer, Musli Çelebi el-kâtib ve gayruhüm