Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 203 Hüküm no: 175 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Maktûl İbrahim Paşa’nın silâhşoru olup öldürülen Arab el-Hâc Mustafa Ağa’nın eşi olduğunu şahitlerle ispat ettiği Vezîriazâm-ı sâbık Maktûl İbrahim Paşa’nın silâhşoru olup Mahmiye-i İstanbul’da Soğanağa Mahallesi’nde sâkin iken bundan akdem katîlen vefât eden Arab el-Hâc Mustafa Ağa b. Abdullah b. Abdurrahman’ın verâseti zevce-i metrûkeleri mahalle-i mezbûre sâkinelerinden Âişe bt. Abdullah atîka-i merhûm Çorlulu Mehmed Paşa’ya ve vilâyet-i Anadolu’da vâki‘ medîne-i Adana’da sâkine Âişe bt. ( ) ve Elif bt. ( ) ve Hadice bt. ( ) nâm hatunlara ve sulbî sagīr oğlu Mehmed’e ve sulbiye kebîre kızları medîne-i mezbûrede sâkine Ümmügülsüm ve Âişe nâm hatunlara münhasıra olduğu şer‘an müte‘ayyin oldukdan sonra zevce-i mezbûre Âişe Hatun meclis-i şer‘-i şerîf-i enverde sagīr-i mezbûr Mehmed’in vâlidesi ve tesviye-i umûruna kıbel-i şer‘den mansûbe vasîsi olmağla müteveffâ-i mezbûrun terekesine bi’l-vesâye vaz‘-ı yed eden Meryem bt. Abdullah nâm hatun mahzarında üzerine da‘vâ ve takrîr-i kelâm edip bundan akdem ben nefsimi elli guruş mehr-i müeccel tesmiyesiyle müteveffâ-i mezbûr hayâtında akd ve tezvîc ol dahi ber-vech-i muharrer tezevvüc ve kabûl eylediğinden sonra meblağ-ı mezbûr zimmetinde iken kable’l-edâ vefât etmeğin hâlâ mezbûre vasîye suâl olunup meblağ-ı mezbûru zevcim müteveffâ-i mezbûrun tereke-i vâfiyesinden bana edâ ve teslîme tenbîh olunması matlûbumdur dedikde gıbbe’s-suâl mezbûre vasî cevâbında tereke-i müteveffâ-i mezbûra ber-vech-i muharrer bi’l-vesâye vaz‘-ı yedini ikrâr mâ‘adâyı inkâr edicek müdde‘iyye-i mezbûreden müdde‘âsına mübeyyine beyyine taleb olundukda udûl-i ahrâr-ı ricâl-i Müslimînden ve mahalle-i mezbûre sâkinlerinden Ali b. Abdullah ve nisâ-i sâlihâtdan Fâtıma bt. Hüseyin ve diğer Fâtıma bt. Ahmed nâm hatunlar li-ecli’ş-şehâde meclis-i şer‘de hâzirûn olup isre’l-istişhâd fi’l-hakīka işbu müdde‘iyye-i mezbûre bundan akdem nefsini elli guruş mehr-i müeccel tesmiyesiyle vezîriazam-ı sâbık Maktûl İbrahim Paşa’nın hayâtında silâhşoru iken katîlen vefât eden Arab el-Hâc Mustafa Ağa b. Abdullah b. Abdurrahman’a bizim huzûrumuzda akd ve tezvîc eylediğinde ol dahi ber-minvâl-i muharrer tezevvüc ve kabûl eyledi müdde‘iyye-i mezbûre müteveffâ-i mezbûrun zevce-i menkûha-i metrûkesidir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olup müdde‘iyye-i mezbûre tahlîf-i şer‘î-birle tahlîf olunmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 10 Cumâdelûlâ sene [1]143. Şuhûdü’l-hâl: Mustafa Odabaşı b. Mehmed, Mustafa Ağa b. Mustafa, Hüseyin b. Mustafa, Mehmed Çelebi b. Abdullah, el-Hâc Ebûbekir Ağa b. Mustafa.