Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 202 Hüküm no: 174 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Solakbaşı Ali Ağa’ya borçlu olan Ahmed b. Hüseyin’in borcunu vasi tayin olunan Veli’ye ödemesi Bâ-imzâ-i hazret-i efendi. Mahmiye-i İstanbul’da Sultan Mehmed Câmi‘-i şerîfi kurbünde Molla Kirmasti Mahallesi’nde sâkin iken bundan akdem vefât eden Solakbaşı Ali Ağa b. Mustafa b. Abdullah’ın verâseti zevce-i menkûha-i metrûkesi Ümmühani Hatun bt. Abdullah ile sulbî kebîr oğlu gāib ani’l-beled Ebûbekir Efendi’ye münhasıra olmağla müteveffâ-i mezbûrun li-ebeveyn er karındaşı ve ber-vech-i âtî vasiyy-i muhtârı olduğunu iddi‘â eden bâ‘isü hâzihi’l-vesîka Veli Efendi b. el-mezbûr Mustafa meclis-i şer‘-i hatîr-i lâzımü’t-tevkīrde müteveffâ-i mezbûrun medyûnlarından Ahmed b. Hüseyin nâm kimesne mahzarında üzerine da‘vâ ve takrîr-i kelâm edip karındaşım müteveffâ-i mezbûr Ali Ağa’nın işbu mezbûr Ahmed zimmetinde cihet-i karz-ı şer‘îden yüz guruş hakkı olup ve müteveffâ-i mezbûr vefâtından altı gün mukaddem hayâtında ben bi-emri’llâhi te‘âlâ vefât eylediğimde cemî‘ terekemi ve zimem-i nâsda olan hukūkumu sen ahz u kabz edip sünnet-i seniyye üzere techîz ve tekfîn ve levâzım-ı defnim gördükden sonra terekemin sülüsünü ifrâz ve sülüs-i mezbûrdan elli guruş ile üç Mushaf-ı şerîf iştirâ olunup her birini talebe-i ulûmdan birer müstahik kimesneye verile ve sülüs-i mezbûrdan müdebberlerim olan Hasan ve Hüseyin ve Muazzeze’den her birine onar guruş verile ve sülüs-i mezbûrdan nesne bâkī kalırsa kendi dilediği vücûh-ı birre harc ve sarf ede ve mâ‘adâ sülüsân terekem dahi veresem beyninde alâ-mâ-farazallâhu tevzî‘ ve taksîm oluna deyü vasiyyet ve tenfîzine beni vasiyy-i muhtâr nasb ve ta‘yîn eyledi ben dahi ber-vech-i muharrer vesâyet-i mezbûreyi kabûl etmemle meblağ-ı mezbûr yüz guruşu merkūm Ahmed Ağa’dan bi’l-vesâye taleb ederim suâl olunup bana teslîme tenbîh olunmak murâdımdır dedikde gıbbe’s-suâl mezbûr Ahmed cevâbında müteveffâ-i mezbûra cihet-i mezbûreden zimmetinde yüz guruş deyni olduğunu ikrâr lâkin müdde‘î-i mezbûrun ber-vech-i muharrer vesâyetini inkâr edicek müdde‘î-i mezbûrdan ber-vech-i muharrer müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve Mahmiye-i mezbûrede Mi‘mâr Sinan Mahallesi ahâlîsinden Salih Çelebi b. Abdullah ve Mustafa Çelebi b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-i mezbûr Solakbaşı Ali Ağa b. Mustafa b. Abdullah vefâtından altı gün mukaddem bizim huzûrumuzda şöyle vasiyyet eylediği bi-emri’llâhi te‘âlâ vefât eylediğimde cemî‘ terekemi ve zimem-i nâsda olan hukūkumu sen ahz u kabz edip sünnet-i seniyye üzere techîz ve tekfîn ve levâzım-ı defnim gördükden sonra terekemin sülüsünü ifrâz ve sülüs-i mezbûrdan elli guruş ile üç Mushaf-ı şerîf iştirâ olunup her biri talebe-i ulûmdan birer müstahik kimesneye verile ve sülüs-i mezbûrdan müdebberlerim olan Hasan ve Hüseyin ve Muazzeze’den her birine onar guruş verile ve sülüs-i mezbûrdan nesne bâkī kalırsa kendi dilediği vücûh-ı birre harc ve sarf ede deyü vasiyyet ve tenfîzine karındaşım müdde‘î-i mezbûr Veli Efendi’yi vasiyy-i muhtâr [37b] nasb ve ta‘yîn eyledikde ol dahi vasiyyet-i mezbûreyi kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı mezbûr yüz guruşu vasiyy-i mezbûra edâ ve teslîme mezbûr Ahmed’e tenbîh-birle mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelûlâ sene [1]143. Şuhûdü’l-hâl: Mehmed Çelebi b. Abdullah, diğer Mehmed Çelebi b. Ahmed, Kādızâde İbrahim b. Mustafa, Ahmed Çelebi b. el-Hâc Hasan, Abdullah b. Mustafa, Salih b. Süleyman.