Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 121 Hüküm no: 65 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Pîr Veli ile Yusuf b. Mehmed Fakih’in alacak verecek anlaşmazlığı Oldur ki Sart kazâsının Kattarte nâm karyeden Mahmud b. Pîr Veli meclis-i şer‘-i şerîfde karye-i mezbûreden Yusuf b. Mehmed Fakih nâm kimesne mahzarında da‘vâ kılıp nâzır-ı emvâl-i hâssa olan Müstecâb nâm nâzır Abdülkerim Emîn’e sen kefîlsin deyu benden dört bin akçe alıp vefât eyledikden sonra oğlu Mustafa Çelebi’den meblağ-ı mezbûru taleb edip emr-i şerîf çıkarıp âkıbet Müslümanlar bizi ıslâh edip iki bin akçe vericek olup ona binâ’en bir gümüşlü evânî mezbûr Mustafa Çelebi bana iki bine verip ben dahi Yusuf’a verip benim hakkım mezbûr Yusuf’a geçip altı yüz akçesin alıp bin dört yüz akçem bâkī kaldı taleb ederim deyip mezbûra suâl olundukda sahîhi vech-i meşrûh üzre mezbûr Mahmud merkūm Mustafa Çelebi’den da‘vâ eyledikde iki bin akçeye sulh olup bir gümüşlü oyanı mezbûr Mustafa Çelebi ona ol dahi bana verip bu vechile ıslâh oldular lâkin mezbûr Mahmud oğlu Abdurrahman nâm emredi mezbûr Mustafa Çelebi’ye vermek şartıyla mezbûr Mustafa Çelebi sulh oldu idi mezbûr Mahmud mezbûr emred oğlunu vermeyip sulh-ı şer‘î dahi fâsid olmuşdur deyip mezbûr Mahmud sulh bu şartla olmadı isbât eyle deyip ol dahi mehil alıp mehil tamâm olup sulh-ı mezbûr şartla mezbûr ile olduğuna mezbûr Yusuf beyyine-i ityânından âciz olmağın mezbûr Mahmud’a sulh-ı mezbûr şart-ı merkūm ile olmadığına yemîn eyle denilip ol dahi sulh-ı mezbûrda şart-ı mezkûr anılmadı deyu yemîn billâh etmeğin bâkī-i mezbûr bin dört yüz akçe mezbûr Yusuf’dan hükm olunup ve mâ vaka‘a bi’t-taleb sicil olundu. Fî evâsıtı Rebî‘ilâhir sene elf. Şuhûdü’l-hâl: Muttalib b. Süleyman, Mehmed b. Behrâm, Şemseddin b. Sâdık, Sefer b. Abdullah, Fazlı Çelebi el-kâtib ve Mehmed Çelebi el-kâtib