Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 206 Hüküm no: 177 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mustafa b. İbrahim’in evinin yarısını eşi Fâtıma bt. Abdullah’a sattığı Mübâya‘a Mahmiye-i İstanbul’da Aksaray kurbünde Koğacı Dede Mahallesi’nde sâkin el-Hâc Mustafa b. İbrahim nâm kimesne meclis-i şer‘-i şerîf-i enverde zevce-i menkûhası bâ‘isü’l-kitâb Fâtıma bt. Abdullah mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîh[im]de münselik olan emlâkimden olup mahalle-i mezbûrede vâki‘ bir tarafdan el-Hâc Ahmed menzili ve bir tarafdan İbrahim Beşe menzili ve bir tarafdan el-Hâc Abdülbâki menzili ve bir tarafdan tarîk-i âm ile mahdûd fevkānî iki bâb oda ve bir sofa ve dehlîz ve tahtında bir matbah ve bir kenîf ve bi’r-i mâ ve bir mikdâr bahçe ve havluyu müştemil mülk menzilimin nısf-ı şâyi‘ini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevcem mezbûreye iki yüz guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr iki yüz guruş mütâlebesinden zevcem mezbûre Fâtıma’nın zimmetini ibrâ ve iskāt eyledim fîmâ-ba‘d menzil-i mahdûd-ı mezkûrun nısf-ı şâyi‘i zevcem mezbûrenin mülk-i müşterâsı ve hakk-ı sırfı olup benim kat‘â alâka ve medhalim kalmamışdır keyfe mâ teşâ’ân ve tahtârân mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 Cumâdelûlâ sene [1]143. Şuhûdü’l-hâl: El-hâc Ya‘kub b. Mustafa, Receb b. İbrahim, el-Hâc Ahmed b. Mustafa, İbrahim b. Receb, Süleyman b. Halil, Osman b. Ebûbekir, Ahmed b. Hasan.