Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 206 Hüküm no: 178 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bardakçı, destici ve çömlekçi esnafına su künkçü esnafının işlerine müdahale etmemeleri için tenbih olunduğu Su künkü hırfetinin hücceti Medîne-i Hazret-i Ebû Eyyüb el-Ensârî’de vâki‘ su künkü işleyen hirfet erbâbının kethüdâları Veys b. Mustafa ve hırfet-i mezbûre erbâbından ashâbü hâzihi’l-vesîka Mehmed b. Mustafa ve Ahmed b. Mehmed ve Süleyman b. Mustafa nâm kimesneler meclis-i şer‘-i hatîr-i lâzımü’t-tevkīrde yine medîne-i mezbûrede vâki‘ bardak ve çanak ve çömlek ve desti işleyen hirfet erbâbından Mehmed b. Musa ve karındaşı Mustafa ve âhar karındaşı İsmail ve Kullaboğlu Ali nâm kimesneler muvâcehelerinde biz medîne-i mezbûrede kadîmü’l-eyyâmdan berü dört aded kadîm künkçü kârhânesi erbâbından olup işbu yedimizde olan evâmir-i aliyyeler mantûkunca bardakçı ve destici ve çömlekçi hırfetinden olanlar bizim san‘atımıza kat‘â müdâhale ve mu‘âraza etmezler iken mezbûrûn Mehmed ve Mustafa ve İsmail ve Ali kendilere mahsûs olan san‘atlarına kanâ‘at etmeyip bize mahsûs olan su künkünü bir seneden berü hilâf-ı kadîm ve mugāyir-i fermân Soğancıbaşı Ahmed nâm kimesneye istinâden işleyip bize gadr ve nizâmımızın ihtilâline bâ‘is olmuşlardır deyü teşekkî ettiklerinde mezbûrûn Mehmed ve Mustafa ve İsmail ve Ali cevâblarında kendileri an-asl bardakçı ve çömlekçi ve destici hırfetlerine mahsûs olan kırk iki aded kârhâne erbâbından olup künkçü hırfetinden olmadıklarını ikrâr ettiklerinden mâ‘adâ yine kendi hırfetleri erbâbından Süleyman b. Mustafa ve Ali b. Mustafa ve Mehmed b. Mustafa ve es-Seyyid Hasan b. İbrahim ve İsmail b. Mustafa ve Halil b. İbrahim ve Yusuf b. Ahmed ve Mustafa b. Ahmed ve İbrahim b. Mahmud ve Ahmed b. Mahmud ve Mehmed b. Mustafa ve el-Hâc Mehmed b. Mustafa ve Mehmed b. Osman ve Mustafa b. Mehmed ve el-Hâc Ömer b. Mehmed ve Mehmed b. Hasan ve Nasuh b. Mehmed ve es-Seyyid el-Hâc Mehmed b. Mustafa ve es-Seyyid Eyüb b. Mehmed ve el-Hâc Mustafa b. Ahmed ve sâirleri kırk yedi nefer ma‘lûmü’l-esâmî kimesneler meclis-i şer‘de künkçü hırfetinin işbu yedlerinde olan müte‘addid evâmir-i aliyyeler mantûkunca medîne-i mezbûrede ancak dört aded künkçü kârhânesi ve kırk iki aded bardakçı ve destici ve çömlekçi kârhânesi olup birbirlerine mahsûs olan san‘atlarını bu ana gelince kat‘â müdâhale ve mu‘âraza olunduğu [38b] yokdur ve birbirlerinin san‘atlarına müdâhale nizâmlarına muhâlifdir deyü ihbâr etmeleriyle mezbûrûn Mehmed ve Mustafa ve İsmail ve Ali’ye künkçü hırfeti yedlerinde olan evâmir-i aliyyelere muhâlif ve nizâm-ı kadîmlerine mugāyir vaz‘ u hareket etmeyip ve kendilere mahsûs olan su künkünü min-ba‘d işlememek üzere ber-mûceb-i emr-i âlî tenbîh-birle hıfzan li’l-makāl mâ-hüve’l-vâki‘ bi’t-taleb ketb olundu. Fî 10 Cumâdelûlâ sene [1]143. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, İbrahim b. Mustafa, Ahmed b. Hasan, el-Hâc Mehmed b. Mustafa, el-Hâc Ömer b. Mehmed, Ali b. Mustafa, İsmail b. Mustafa, Mehmed b. Osman, Ahmed b. Ali, Ali b. Mehmed.