Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 135 Hüküm no: 101 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlyas b. Zopon Mehmed’in parasını alan Sinan Çavuşla sulh olduğu Sivas sâkinlerinden İlyas b. Zopon Mehmed tarafından husûs-ı âtîye şer‘an vekâleti sâbite olan sekizinci ağa bölüğünden Hasan b. Muslihiddin nâm acemi oğlanı meclis-i şer‘de Dergâh-ı âlî çavuşlarından Sinan Çavuş mahzarında tav‘an ikrâr ve takrîr-i merâm kılıp müvekkilim mezbûr Sinan Çavuş Sivas Beylerbeyisi’nin kethüdâsı olup benim müvekkilim benim için kan eyledi sen onun kefîlisin deyu tutup biraz akçesin almışdı hâlâ aldığı akçesin ben dahi mezbûr Çavuş’dan da‘vâ ve taleb eyleyip isbât eylemek mahallinde iken müslimûn bizi ıslâh edip bedel-i sulh bana on beş guruş verdiler ben dahi ol bedel-i sulh olan on beş guruşu alıp kabûl ve kabz edip da‘vâ-yı mezbûreden mûmâileyh Sinan Çavuş’un zimmetini ibrâ’ ve ıskāt eyledim dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr bi’l-muvâcehe tasdîk ve’l-müşâfehe tahkīk eyledikden sonra mâ vaka‘a sicil kayd olundu. Fî evâili Cemâziyelevvel li sene elf. Şuhûdü’l-hâl: Mübâşir Mehmed Çavuş an çavuşân-ı Dergâh-ı âlî, es-Seyyid Abdülhadi b. Es-Seyyid Abdülkerim, Fazlı Çavuş Dergâh-ı âlî, Hasan Ağa b. Abdullah, Rıdvan Çavuş, Yusuf Çavuş, Piyâle Çavuş, Habîb b. Abdullah ve gayruhüm