Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 140 Hüküm no: 113 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terzi Ali’nin kızı Rahime’ye kalan mülklerin sancakbeyi tarafından başkalarına satıldığı iddiasının araştırılması Kıdvetü’l-kuzât ve’l-hükkâm ma‘denü’l-fazli ve’l-kelâm Mevlânâ Karamürsel kadısı -zîde fazluhû- tevkî‘-i refî‘-i hümâyûn vâsıl olıcak ma‘lûm ola ki dârende-i fermân-ı hümâyûn Terzi Ali nâm kimesne Südde-i sa‘âdetime arzıhâl edip mukaddemâ Hatib oğlu Mehmed nâm kaynım gāyib oldukda mülk-i meşrû‘ı olan ev ve bağı mezkûrûn hâtununa ve karındaşı Yusuf ve hemşîresi Râziye’ye intikāl etmişken mâ-beynlerinde kısmet-i âdile oldukdan sonra mezbûrlar cemî‘an fevt olmak ile verâseti mezkûr Mehmed’in hemşîresi olup bi’l-fi‘l menkūhem olandan hâsıl olan Rahime nâm sagīre kızıma intikāl etmişken sâbıkan sancağımız beyi olan kimesne fuzûlen hilâf-ı şer‘-i şerîf âhara bey‘ edip gadr ve hayf eyledi şer‘-i şerîf ve fetvâ-yı münîf mûcebince velâyete zi’l-yed olandan alıverilmek taleb ederim deyu bildirdi buyurdum ki hükm-i şerîfimle vardıkda husemâyı berâber edip bir def‘a şer‘le fasl olunmayıp ve bilâ özr-i şer‘î on beş yıl mürûr etmiş değil ise ber mûceb-i şer‘-i şerîf teftîş ve tefahhus edip ve fetvâsına nazar edip göresiz kazıyye i‘lâm olunan gibi ise ol bâbda emr-i şer‘-i kavîm ile amel edip ba‘de’s-sübût müteveccih olan ev ve bağı zi’l-yed olandan fetvâsı mûcebince hükm edip alıveresiz dahi şer‘-i şerîf ve fetvâ-yı münîfe muhâlif te‘allül ve nizâ‘ ettirmeyip bu husûs için bir dahi kapıma şikāyet ettirmeyesiz hak üzre olup tezvîr ve telbîsden ve şuhûd-ı zûrdan hazer edip ve medhali olmayanı dahl ettirmeyesiz mütemerridi sekidib inâd ve muhâlefet edenleri isimleri ile yazıp bildiresiz şöyle bilesiz deyu hükm-i şerîfim yedinde ibkā edip alâmet-i şerîfe i‘timâd kılasız. Tahrîren fî evâhiri şehri Rebî‘ilâhir li sene elf mine’l-hicreti’n-nebeviyye. Be-makām-ı Kostantıniyye