Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 145 Hüküm no: 123 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Paşa Vakfı’na ait handaki kiracı Mehmed’in, vakfa olan borcunu havaleye teslim ettiği Mahrûse-i Üsküdar’da medfûn merhûm el-Hâc Ahmed Paşa evkāfına kāimmakām-ı mütevellî olan Abdi b. Abdullah ve fahrü’l-akrân Cemşid Ağa b. Abdülmüste‘ân nâm kimesneler mahfil-i kazâda mahmiye-i Kostantıniyye’de vâki‘ Fîruz Ağa mahallesinde vâki‘ hân evkāf-ı mezbûreden olup hân-ı mezbûrun müste’ciri Mehmed b. Yakub nâm kimesne mahzarında da‘vâ edip hân-ı mezbûrun ücretinden olan altı bin beş yüz yetmiş iki akçe bâkī kalıp meblağ-ı mezbûru Muhzır Abdülmuttalib’e havâle eylemiş idik hâlâ mezbûr Mehmed meblağ-ı merkūmu bi’t-tamâm mütevellî-yi merkūma teslîm eyledim şâhidlerim vardır altı bin akçesin teslîm edip târih-i kitâbdan üç güne kefîl vereyim der suâl olunsun deyicek merkūm Mehmed zikr olunan on altı bin beş yüz yetmiş iki akçeyi teslîm eylediğime şâhidlerim vardır altı bin akçe mühürlenip emânet vaz‘ olunup ve bâkī kalan akçeye kefîl vereyim deyicek altı bin akçe mühürlenip bir mu‘temedun aleyh kimesneye emânet vaz‘ olunup ve bâkī kalan akçeye husûs-ı mezbûra mübâşir ta‘yîn buyurulan Dergâh-ı âlî çavuşlarından Mustafa Çavuş b. Abdullah nâm kimesne târih-i kitâbdan üç güne kefîl olup üç güne dek mezbûr Mehmed gaybet ederse zarar-ı mâla kefîl oldum deyip mezbûr üç güne şâhidleri ihzâr için üç güne mehil verildiği kayd-ı sicil olundu. Hurrire zâlik hurrire fi’l-yevmi’l-âşir min şehri Cemâziyelevvel sene elf. Şuhûdü’l-hâl: Behrâm Subaşı, Şeyh Maksud b. İsa, Muttalib b. Süleyman ve gayruhüm