Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 152 Hüküm no: 140 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in, Mustafa Reis b. Ahmed’teki hisselerinin verilmesi Mahrûse-i Üsküdar’da Solak Sinan mahallesinde sâkin olan Mustafa b. Mehmed mahfil-i şer‘-i şerîfde mahrûse-i mezbûrede Gülfem mahallesi sâkinlerinden Mustafa Reis b. Ahmed mahzarında takrîr-i merâm kılıp mezbûr Reis’e iki bin akçeye bir pay vermek üzre Galos nâm mahalle sefer ettiğinde otuz bin akçe ve Acısu nâm mevzi‘a sefer ettiğinde otuz bin akçe ve Kefe’ye ve Acısu’ya gittiğinde altmış bin akçe mezbûr Reis ol Galos seferinde dört bin akçe tekrâr Galos seferinde on bin akçe ve Acısu seferinde altı bin akçe ve Kefe seferinde dört bin akçe cem‘an yirmi dört bin akçe kande alıkoyup andan bana hisse vermeyip kendi yoldaşlarıyla mâ-beynlerinde taksîm eylemiş andan dahi hisse taleb edip mezbûr Mustafa Reis’e suâl olundukda bu kadar akçeyi kandeden alıkoyup yoldaşlarıma taksîm ediverdim ve mezbûr Mustafa’nın sahîh zikrettiği gibi dört seferinde bu kadar akçesin iki bin akçesine bir pay vermek üzere müdârebe tarîkiyle aldım deyu ikrâr ettiğinde ya senin gemin ve sermâyen ve yoldaşların ve mezbûr Mustafa’nın akçesi ne kadar paya müstahak oldu idi bu seferlerde deyu mezbûr Reis’e suâl olundukda üç yüz altmış pâre gemim ve yoldaşlarım müstahak olduğu ve sermâyem müstahak olup mezbûr Mustafa’nın akçesi doksan paya müstahak idi deyu cevâb vermeğin mezbûr Mustafa’nın müstahak olduğu payı onların cümlesi müstahak olduğu payın humusu vâki‘ olmak ile mezbûr Reis’in ikrârı üzre ber mûceb-i hesâb mezbûr Mustafa’ya yirmi dört bin akçeden dört bin sekiz yüz akçe humus hisse hükm olundukda mâ vaka‘a bi’t-taleb terkîm olundu. Hurrire fî evâili Cemâziyelevvel li sene elf. Şuhûdü’l-hâl: Fazlı Çelebi, Mehmed Çelebi b. İbrahim, Muttalib b. Süleyman, Hüseyin b. Behrâm, Şemseddin b. Sâdık Derkenar: Müsveddede kalmağın bu mahalle kayd olundu