Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 153 Hüküm no: 143 Orijinal metin no: [14b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Çalabverdi’nin, ekili arâzilerde koyun yürütülmeme hususunda köylülerle anlaştığı Husûs-ı âtînin istimâ‘ı ve fasl ve kat‘î fermân olunmağın mübâşir ta‘yîn olunan Dergâh-ı âlî çavuşlarından fahrü’l-akrân Bâli Çavuş mübâşeretiyle akd-i meclis kılındıktan sonra Üsküdar kazâsına tâbi‘ Gekvize nâhiyesinde Hereke nâm karyeden Eymir b. İsa Bâli ve Hamza b. Mustafa ve Seyyid Ali b. Halil ve Bâli b. Sofi ve diğer Bâli b. Mahmud ve Hasan b. Üveys ve Fazlı b. Hamza ve Ahmed b. Seferşah ve Mustafa b. Mahir ve Ali b. Üveys ve Bâli b. Seydî ve Ali b. Hüseyin ve Osman b. Abdullah ve sâir ahâlî-i karye meclis-i şer‘-i şerîfe Kocaeli doğancıbaşısı olan Mustafa Çalabverdi nâm kimesne mahzarında ikrâr ve edâ-yı kelâm edip mezbûr doğancıbaşı bizim tarlalarımız arasında ağıl ihdâs edip koyun girdirip ekinimiz yedirip ve çiğnetip hayf etmeğin ref‘ için emr-i şerîf ihrâc edip mezbûr doğancıbaşı dahi yirmi otuz yıldan beri koyunum yürüyü geldi geri yürütürüm deyip mâ-beynimizde nizâ‘ mümted olup tarafeynden emr-i şerîf ihrâc olunup âkıbet muslihûn tavassutuyla şu minvâl üzre sulh olduk ki karye-i mezbûre hudûdunda Çerkes ini nâm mahalle andan yukarı Seferşah gökü andan Kireç Fırını andan Boğsak Kaya andan Hoca mülkü andan Pekmez Toprağı andan Kara Hasan Harmanı andan Kilise Pınarı andan deryâya varınca bu zikr eylediğimiz sınır içinde yüzü ekilmemiş tarlalara ve yerlerde bu seneden gelecek bin bir senesinde mezbûr doğancıbaşı koyunların dölün alıncaya dek yürütüp dölün aldıkdan sonra zikr olunan sınır içinde koyun yürütmeyip âhar yerlerde yürütmek üzre kavl ve ahd eyledik sulh-ı mezbûru her kim fesh eyleyeyim derse amel olunmaya dediklerinde mezbûr doğancıbaşı dahi ikrâr-ı mezbûru tasdîk edip vech-i meşrûh üzre sulh olup ahd ve kavl eyledik dediğinde mâ vaka‘a bi’t-taleb terkîm olunup yed-i tâlibe def‘ olundu ki müzekkir-i mâ cerâ ola. Tahrîren fî evâsıtı Cemâziyelevvel li sene elf mine’l-hicreti’n-nebeviyye. Şuhûdü’l-hâl: Mübâşir Mehmed Çavuş, Mehmed b. Ahmed, Şeyh Halîfe b. İlyas, Fazlı Çelebi er-râcil, Mehmed b. Behrâm, Şemseddin b. Sâdık, Muttalib b. Süleyman, Hasan b. Sâdık, Sefer b. Abdullah, Musli Çelebi el-kâtib