Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 160 Hüküm no: 157 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aknad v. Can Azîz’in, Hasan Bey b. Abdullah’a olan borcuna karşılık ev, tarla ve bağlarını rehin bıraktığı Budur ki Erzincan kazâsından Seyyib Yatağı nâm karyeden Eknad v. Can Azîz nâm kimesne mahfil-i şer‘-i şerîfde bâ‘is olan Hasan Bey b. Abdullah nâm za‘îm mahzarında edâ-yı kelâm edip Dergâh-ı âlî müteferrikalarından fahrü’l-emâsil Yahya Kethüdâ nâm müteferrikada karye-i mezbûre ahâlîsinin bunda mahmiye-i İstanbul’da olan mesâlih-i mühimmâtı için altı bin nakd râyicü’l-vakt akçe alıp karye-i mezbûrede ma‘lûmü’l-hudûd evlerimi ve bağlarımı ve tarlalarımı meblağ-ı mezbûru benden kabza vekîl eylediği Piyâle Çavuş’a rehin vaz‘ eylemişdim hâlâ mezbûr Hasan Bey ile bu minvâl üzre eyledik ki mezbûr Hasan Bey kendi mâlıyla Yahya Kethüdâ’ya olan altı bin akçe deynimi edâ edip edâsı mukābelesinde zikr olunan evlerimi ve bağlarımı ve tarlalarımı ben kendiye edâ eylediği ve bize bin akçeyi edâ eyleyince kabz ve tasarruf eyleye dediği mukırr-ı mezbûru cemî‘ kelâmında mezbûr Hasan Bey bi’l-muvâcehe tasdîk edip vech-i meşrûh üzre mâl-ı mezbûru merkūm kethüdâ’ya edâya mezbûr evleri ve bağları ve tarlaları kabz ve tasarrufa müte‘ahhid oldum dedikden sonra mâ vaka‘a bi’t-taleb kayd olundu. Şuhûdü’l-hâl: Mehmed Efendi b. Mustafa el-kadı, Mevlânâ Ali el-müderris, Mevlânâ Mehmed Efendi, Bâli Çavuş b. Eşref ve gayruhüm