Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 166 Hüküm no: 170 Orijinal metin no: [17a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın, ölen Resûl’e borcunu ölmeden önce ödediği Budur ki Bundan akdem müteveffâ Resûl’ün sagīr oğlu Ali’ye kıbel-i şer‘den vasî nasb olunan zevcesi Hûri nâm hâtun mahfil-i kazâda Mehmed b. Hasan nâm kimesne mahzarında takrîr-i da‘vâ edip müteveffâ zevcem mezbûr Resûl’ün, Şaban b. Bünyad nâm kimesnede iki yüz doksan akçesi olup ve kırk akçe dahi Nebi nâm kimesnede olup mezbûrân Şaban ve Nebi zikr olunan akçeyi mezbûr Mehmed’e verip zevceme ver deyu ısmarlayıp ve kendiden bin yetmiş akçe cem‘an bin dört yüz akçe olup mezbûr Resûl vefât etmeğin zimmetinde kalmışdır vesâyetim devr etmem hasebiyle taleb ederim dedikde gıbbe’s-suâl mezbûr Mehmed cevâb verip bundan akdem meblağ-ı mezbûru mezbûre Hûri, Ebâ Eyyûb el-Ensârî’de hâkimü’ş-şer‘ huzûrunda da‘vâ edip ben dahi meblağ-ı mezbûru müteveffâ-yı mezbûra hâl-i hayâtında edâ eylediğimi isbât edip yedime hüccet-i şer‘iyye dahi aldım deyu kelâmına muvâfık hüccet ibrâz edip mazmûn-ı merkūmun kelâmına mutâbık olıcak mezbûre Hûri mazmûn-ı hücceti inkâr edicek zeylinde mastûr olan Müslümanlardan Receb b. İbrahim ve Hasan b. Bâli nâm kimesneler edâ-yı şehâdet edip zikr olunan hüccet mezbûrenin huzûrunda oldu dediklerinde hayyiz-i kabûlde vâki‘ oldukdan sonra da‘vâdan men‘ olup kayd olundu. Tahrîren fî evâili Cemâziyelevvel sene elf. Şuhûdü’l-hâl: es-Sâbikūn