Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 174 Hüküm no: 191 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Panayot’a, ölen dayısı Kara Dimo’dan bir ev kaldığı Budur ki Yani v. Panayot nâm zimmî mahfil-i kazâda Üsküdar kazâsına tâbi‘ nâhiye-i Cezâyir’den olup merhûm Şehzâde Sultân Mehmed Hân aleyhi’r-rahmetü ve’r-rıdvân hazretlerinin evkāfından Maltepe karye sâkinlerinden fevt olan Kara Dimo nâm zimmînin zevcesi Vasakine Varati nâm sagīre kızlarının vasîsi ve vâlidesi olan Marto bt. Mihal nâm zimmîye mahzarında takrîr-i da‘vâ ve ta‘bîr-i merâm edip karye-i mezbûrede Alekso nâm zimmî dayım mürd olup karye-i mezbûrede bir cânibi Terzioğlu Andriye evine ve bir cânibi Marko nâm zimmînin bahçesine ve bir cânibi tarîk-i âm ile mahdûd mülk evi kendiye muttasıl tevâbi‘ ve levâhıkıyla ırs ciheti ile li ebeveyn hemşîresi olan vâlidem Furuşte bt. Mihal’e intikāl edip vâlidem dahi fevt olup verâseti bana münhasıra olmak ile mezbûr ev bana intikāl etmiş iken mezbûrlara Terzi Kara Dimo’dan intikāl eyledi Kara Dimo Aleksan mezbûr fevt oldukda veresesi olmamak ile karye-i mezbûre mütevellîsinden satın aldı deyu bî-vech tasarruf ederler deyu mezbûr evi taleb edip mezbûre Marto’dan suâl olundukda zevcem mezbûr Kara Dimo mezbûr evi Aleksan mezbûr fevt olduğunda karye-i mezbûre mütevellîsinden aldı hâlen fevt olup bana ve kızları olan sagīretân-ı mezkûretâna intikāl eyledi deyu cevâb verip mezbûr Yani’den da‘vâsına mutâbık beyyine taleb olundukda Mehmed b. Abdullah nâm Müslüman ve Nikola v. Marko nâm zimmî edâ-yı şehâdet edip sahîh-i mezbûr ev-i merkūm Aleksan’ın mülkü idi fevt olup verâseti li ebeveyn hemşîresi ve mezbûr Yani’nin vâlidesi olan Furuşte nâm zimmîyeye munhasıra olmak ile mezbûr ev ona intikāl edip ol dahi fevt olup verâseti oğlu mezbûr Yani’ye münhasır olmak ile mezbûr ev mezkûr Yani’ye intikāl etmişdir şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup merkūm ev mezbûr Yani’ye hükm olunup mâ hüve’l-vâki‘ bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: El-Hâc Hüseyin [b.] Mustafa, Müstedâm Bey [b.] Abdullah, Sefer b. Abdullah, Muttalib [b.] Süleyman ve gayruhüm