Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 181 Hüküm no: 209 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem Paşa Vakfı’na, Abdullah Ağa Vakfı’na ait yerlerle ilgili vakıf arâzisi davası açıldığı Mahmiye-i Kostantıniyye’de Büyük Ayasofya evkāfına mütevellî olan fahrü’l-emâcid ve’l-emsâl Ahmed Çelebi b. Kemal Bey ve merhûm ve magfûrun-leh Rüstem Paşa evkāfına mütevellî olan fahrü’l-akrân Mesih Bey b. Abdülmennân mahzarlarında mahrûse-i Üsküdar’a tâbi‘ İstavros nâm karyede câmii olan Abdullah Ağa’nın mütevellîsi Mustafa Çelebi b. İsmail takrîr-i da‘vâ edip mahmiye-i mezbûrede vâki‘ Balıkpazarı kurbunda bir cânibi deryâ ve bir cânibi Gümrükhâne ve iki cânibi tarîk-i âm ile mahdûd olan yüz kırk zirâ‘ arzı merhûm Sultân Bayezid Hân hazretleri mezbûr Abdullah Ağa’ya verip mülknâme-i hümâyûn verip ol dahi dükkânlar binâ edip ve vakıf edip nice zamân tasarruf olundukdan sonra hark vâki‘ olıcak merhûm Rüstem Paşa ol yerler üzerine binâlar edip ve ol tarafta olan arâzi Ayasofya’nın olmağın cümle mukāta‘ayı ona verip bize bir habbe vermez olmuşlar yerimiz tahliye etsinler veyâhud mukāta‘amız bize versinler deyu taleb edip ve mülknâme-i hümâyûn ile vakfiyeyi ibrâz edip nazar olundukda kelâmına muvâfık olup hattâ Ayasofya evkāfı sonra tahrîr olundukda Abdullah Ağa deyu işâret olunmuşdur deyip mezbûrândan suâl olundukda mezbûr Ahmed Çelebi tahrîrnâmede işâret vardır merhûm Rüstem Paşa’dan hicâb edip mütevellîler taleb etmemişler gibi ve Mesih Bey dahi fi’l-hakīka ol kadar yer var imiş gibi işitiriz ammâ hakīkatin vâkıf değiliz deyip mâbeyinlerinde münâza‘at-ı kesîre vâki‘ olup ba‘zı kimesneler dahi Abdullah Ağa’nın vakıf yeri var idiği şâyi‘dir deyip ve’l-hâsıl bir mikdâr mukāta‘a ona verilmek evlâ-yı müşâhede olunmağın merhûm Rüstem Paşa mütevellîsi Mesih Bey Abdullah Ağa vakfına elf senesi Muharremi ibtidâsından yevmî iki akçe vericek olup Mustafa Çelebi dahi râzı olıcak mâ hüve’l-vâki‘ bi’t-taleb sicil olundu. Tahrîren fî evâili Muharremi’l-harâm li sene elf mine’l-hicreti’n-nebeviyye. Şuhûdü’l-hâl: El-Hâc Murad Halîfe b. Abdülmennân, el-Hâc Hüseyin b. Mustafa, Mustafa Çelebi b. Abdi Çelebi el-müezzin be-câmi‘-i Rüstem Paşa, Ali Çelebi b. Mahmud el-imâm, fahrü’l-akrân Mahmud Çelebi b. el-Hâc Mehmed el-mütevellî, Hüseyin b. Behrâm, Mehmed b. Behrâm, Hasan b. Sâdık, Şemseddin b. Sâdık, kâtibü’l-hurûf Mustafa ve gayruhüm mine’l-hâzırûn El-emru kemâ zükire fîhi ketebehü’l-fakīr Ahmed b. Mahmud el-Müvellâ bi Üsküdar Ufiye anhu