Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 183 Hüküm no: 213 Orijinal metin no: [20b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Abdullah’ın, Sinan Paşa’nın sârbânbaşısı Mehmed’in kılıç ve ferâcesini çaldığı Oldur ki Ali b. Mustafa nâm kimesne mahfil-i şer‘-i şerîfde Osman b. Abdullah nâm kimesne mahzarında da‘vâ kılıp mezbûr Osman Sinan Paşa hazretlerinin sârbânbaşısı Mehmed nâm kimesneye yanaşıp bir iki günden sonra mezbûr Mehmed’in bir gümüşlü kılıcın ve benim bir kırmızı ferâcemi alıp firâr eyledi şimdi bulduk taleb eylerim dedikde gıbbe’s-suâl ve akībe’l-inkâr müdde‘î-i mezbûrun da‘vâsına mutâbık beyyine taleb olundukda udûl-i müslimînden İsa b. Kasım ve Mahmud Bey b. Yusuf nâm kimesneler fi’l-vâki‘ mezbûr Osman merkūm Mehmed’e yanaşıp sonra giderdim saraydan taşra çıkar elinde bir gümüşlü kılıç ve ferâcesi elinde bir kırmızı ferâceyi alıp gördük aşağı gitti biz yanına varınca kaçıp gitti ardından yetişemedik ferâce müdde‘î-i mezbûrundur şâhidleriz şehâdet ederiz dediklerinde mâ vaka‘a bi’t-taleb sicil olundu. Fî evâsıtı Cemâziyelâhir sene elf. Şuhûdü’l-hâl: Mustafa b. Mehmed, Çukadâr Mehmed Bey, Hamza b. İbrahim, Mehmed b. Behrâm ve gayruhüm