Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 184 Hüküm no: 214 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Bayezid’in, Halil ve Mehmed b. İbrahim’den zorla tarla aldığı Üsküdar’a tâbi‘ Gençli nâhiyesinden Süleyman b. Bayezid nâm kimesne meclis-i şer‘de nâhiye-i mezbûrede Halil ve Mehmed b. İbrahim nâm kimesneler mahzarında takrîr-i merâm edip mezbûrân Halil ve Mehmed inde’l-ahâlî ma‘lûmetü’l-hudûd olup mukaddemâ benden aldıkları tarlalarının hakk-ı tasarrufunu ma‘rifet-i sipâhi ile bin dokuz yüz akçeye bana tefvîz edip ben dahi mukābelede meblağ-ı mezbûru kendilere bi’t-tamâm teslîm eylediğimden sonra size kerhen verdim deyip tasarrufuma mâni‘ olup men‘ olunmasın taleb eylerim dedikde gıbbe’s-suâl mezbûr Mehmed cevâb verip fi’l-vâki‘ zikr olunan tarlaların hakk-ı tasarrufunu mezbûr Süleyman’a bin dokuz yüz akçeye tefvîz edip mukābele-i tefvîzde meblağ-ı mezbûru bi’t-tamâm aldık deyu ikrâr edip ve mezbûr Halil dahi vech-i meşrûh üzre meblağ-ı mezbûr mukābelesinde mezbûr tarlaların hakk-ı tasarrufunu tefvîz ettim idi lâkin mezbûr Süleyman beni darb eyleyip hissemi ikrâhen bey‘ ettirdi dedikde mâ vaka‘a tahrîr olunup yed-i tâlibe def‘ olundu. Tahrîren fî evâsıtı Cemâziyelevvel li sene elf min hicreti’n-nebeviyye. Şuhûdü’l-hâl: Mevlânâ Yusuf b. Toyran, Mehmed b. Behrâm, Muttalib b. Süleyman, Hasan b. Sâdık Derkenar: ihmâl olunup ve kasden te’hîr olunup âkıbet bu mahalle kayd olundu