Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 220 Hüküm no: 196 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş b. el-Hâc İbrahim ile eşi Hadice bt. Osman b. Abdullah’ın müşterek evlerini el-Hâc Süleyman b. el-Hâc Abbas’a sattıkları Mübâya‘a. Mahmiye-i İstanbul’da Mevlevîhâne Yenikapısı dâhilinde Tarsus Mahallesi sükkânından Ali Çavuş b. el-Hâc İbrahim kendi tarafından asâleten ve zevcesi Hadice bt. Osman b. Abdullah nâm hatun tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre imâmı İbrahim Efendi b. Ali ve Müezzin Mustafa Halîfe b. İbrahim nâm kimesneler şehâdetleriyle sâbit olmağla vekâleten meclis-i şer‘-i şerîf-i enverde üveği oğlu işbu râfi‘u’l-vesîka el-Hâc Süleyman b. el-Hâc Abbas nâm kimesne mahzarında bi’l-asâle ve bi’l-vekâle ikrâr-ı tâm ve takrîr-i kelâm edip zevcem müvekkile-i merkūme ile ale’l-iştirâk yedimizde mülk ve hakkımız olup mahalle-i mezbûrede vâki‘ bir tarafdan Ahmed Çelebi veresesi menzili ve bir tarafdan Medîne-i münevvere Vakfı’ndan olup Doğramacı kerîmesi Âişe Hatun tasarrufunda olan vakıf menzil ve iki tarafdan tarîk-i âm ile mahdûd mülk menzilimizin tarîk-i âm tarafında fevkānî bir bâb oda ve tahtânî iki bâb oda ve iki sofa ve bir hamam ve câmekân ve bir matbah ve bir bi’r-i mâ ve bir mikdâr bahçemizi ba‘de’l-ifrâz tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz guruşa mezbûr el-Hâc Süleyman’a bi’l-asâle ve bi’l-vekâle bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr üç yüz guruşu mezbûr el-Hâc Süleyman yedinden bi-kadri’l-hısas tamamen ahz u kabz eyledik ba‘de’l-yevm menzil-i müfreze-i mezbûre mezbûr el-Hâc Süleyman’ın mülk-i müşterâsı ve hakk-ı sırfı olup bizim kat‘â alâka ve medhalimiz kalmamışdır. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-Cumâdelûlâ sene [1]143. Şuhûdü’l-hâl: Umdetü’l-müderrisîni’l-kirâm el-Hâc Ahmed Efendi b. el-Hâc Mehmed, Mustafa Beşe b. Abdulkādir, Mehmed Çelebi b. el-Hâc Halil, İsmail Çelebi b. el-Hâc Mustafa, İbrahim Çelebi b. Mustafa, Nakkāş Mehmed Çelebi, Ali Çelebi b. İbrahim Efendi, Sarrac Ali Çelebi b. Mehmed.