Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 219 Hüküm no: 195 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Hasan’ın tasarrufunda olan evin kullanım hakkını Rukiye bt. Abdullah b. Abdurrahman’a sattığı Mübâya‘a ve tevcîh. Ashâb-ı hayrâtdan merhûm Za‘îm Mehmed Ağa nâm sâhibü’l-hayrın Mahmiye-i İstanbul’da Cerrâhpaşa kurbünde Kürkçübaşı Mahallesi’nde İhlâshân odaları demekle ma‘rûf süknâya muhtâc sulehâya meşrûta vakfı olup bir tarafdan yine vakf-ı mezbûrdan Kürd Halil menzili ve bir tarafdan vakf-ı mezbûrdan Mîrkelâm Ahmed nâm kimesne menzili ve bir tarafdan yine vakf-ı mezbûrdan Fâtıma nâm hatun menzili ve bir tarafdan tarîk-i hâs ile mahdûd fevkānî bir bâb oda ve tahtânî bir bâb oda ve bir sofa ve kenîf ve havluyu müştemil menzile ber-mûceb-i şart-ı vâkıf tevcîh-i hâkimü’ş-şer‘le mutasarrıf olan İsmail Çelebi b. Hasan meclis-i şer‘-i şerîf-i enverde işbu bâ‘is[etü]’l-vesîka Rukiye bt. Abdullah b. Abdurrahman nâm hatun tarafından husûs-ı âti’z-zikrin tasdîka vekîl olduğu Tarakçı Mustafa Çelebi b. Mehmed ve Süleyman Çelebi b. Ömer nâm kimesneler şehâdetleriyle <> şer‘an vekâleti sâbit olan Abdurrahman b. Ahmed nâm kimesne mahzarında ikrâr-ı tâm ve takrîr-i kelâm edip işbu hüccet-i şer‘iyye mantûkunca ebniye-i mezkûresi yedimde mülk ve hakkım olmağla ebniye-i mezkûreyi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Rukiye Hatun’a yetmiş guruşa bey‘ ve temlîk ve teslîm ve arsasından kasr-ı yed eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yetmiş guruşu müvekkile-i mezbûre Rukiye Hatun bana def‘ ve teslîm ben dahi yedinden tamamen ahz u kabz eyledim dedikde gıbbe’t-tasdîkı’ş-şer‘î mezbûre Rukiye Hatun sâlihâtdan ve süknâya muhtâce idiği zeyl-i kitâbda muharrerü’l-esâmî Müslimîn haberleriyle müte‘ayyin olmağın arsa-yı mezkûre cânib-i şer‘den ber-mûceb-i şart-ı vâkıf mezbûre Rukiye Hatun’a tevcîh ve tasarrufi’çün işbu vesîka ketb ve yedine i‘tâ olundu. Fî 28 Cumâdelûlâ sene [1]143. Şuhûdü’l-hâl: İmâm Ahmed Efendi b. Mustafa, Mustafa Beşe b. Yusuf, Halil Çelebi b. İbrahim, Mehmed Çelebi b. Ahmed, İshak Beşe b. Ali, İbrahim b. Ali, diğer İbrahim b. el-Hâc Mehmed, Abdi Çelebi b. Ali, Mustafa b. Hüseyin, Süleyman b. Ömer, Abdürrahim Çelebi b. Ahmed.