Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 222 Hüküm no: 198 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un süknâsını ulemâya vakfettiği evin Müezzin Abdurrahman Efendi b. el-Hâc Derviş’e tevcih olunduğu Merhûme Fâtıma Hatun nâm sâhibetü’l-hayrın süknâsı ulemâdan bir recül-i sâlihe meşrûta vakfı olup Mahmiye-i İstanbul’da Toptaşı Mahallesi’nde vâki‘ bir tarafdan Zülüflü Ali Paşa menzili ve bir tarafdan yine ulemâya meşrûta menzil ve bir tarafdan Abdurrahman Efendi tasarruflarında olan menzil ve bir tarafdan Tabib-i sânî Mehmed Efendi menzili ve bir tarafdan tarîk-i hâs ile mahdûd iki bâb tahtânî oda ve bir mikdâr bahçeyi muhtevî menzil ulemâdan olmayan Çukadâr Osman nâm kimesneye bundan akdem hilâf-ı şart-ı vâkıf[e] tevcîh olunmağla bâ-fermân-ı âlî ref‘ olunmağın mahalle-i mezbûre müezzini işbu bâ‘isü’l-kitâb Abdurrahman Efendi b. el-Hâc Derviş ulemâdan süknâya muhtâc ve min-külli’l-vücûh mahal ve müstahik idiği mahalle-i mezbûr ahâlîsinden zeyl-i kitâbda muharrerü’l-esâmî Müslimîn ihbâr etmeleriyle süknâ-yı menzil-i mezkûr ber-mûceb-i şart-ı vâkıf[e] kıbel-i şer‘den merkūm Müezzin Abdurrahman Efendi’ye tevcîh olunup tasarrufi’çün işbu vesîka ketb ve yedine def‘ ve i‘tâ olundu. Fî 23 Cumâdelûlâ sene [1]143. Şuhûdü’l-hâl: İbrahim Efendi b. Atâullah el-imâm, el-Hâc Ahmed b. Abdullah, Ali Odabaşı b. Mehmed, Hüseyin Çelebi b. İbrahim, Mehmed Çelebi b. İbrahim, el-Hâc Hüseyin b. Mustafa, Yahya Çelebi b. Abdullah, İbrahim b. Mustafa.