Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 222 Hüküm no: 199 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktûl el-Hâc Mustafa Ağa’nın eşi Ayşe’nin düşük yaptığının anlaşıldığından dolayı başkasıyla evlenmesine izin verildiği Husûs-ı âti’z-zikrin mahallinde ketb ü tahrîri için bi’l-iltimâs savb-ı şer‘î enverden irsâl olunan el-Hâc Mustafa Efendi b. Mehmed Mahmiye-i İstanbul’da Sekbanbaşı Ya‘kubağa Mahallesi’nde sâkine Âişe bt. Abdullah nâm hatunun menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde zâtı Muslu Bey b. Ali ve Ali b. Ali ta‘rîfleriyle mu‘arrefe olan işbu bâ‘isetü’l-vesîka mezbûre Âişe Hatun meclis-i ma‘kūd-ı mezkûrda takrîr-i kelâm ve bast ani’l-merâm edip zevcim olup sadrâzam-ı sâbık İbrahim Paşa silâhşoru iken bundan akdem maktûlen vefât eden el-Hâc Mustafa Ağa b. Abdülkerim b. Abdurrahman’ın firâşından hâsıl hamlim olmağla târih-i vesîkadan altmış gün mukaddem zevcim mezbûrun katl olunduğu haberi mesmû‘um olduğu hâlde havfımdan nâşî müstebînü’l-hilka cenîn-i meyyit ilkā etmemle iddetim münkaziye olmuşdur hakīkat-ı hâl husûs-ı mezkûra vukūfu olan nisâ-i sâlihâtdan işbu hâzırân bi’l-meclis Râbia bt. Ebûbekir ve Âişe bt. Abdullah ve Fâtıma bt. Ahmed ve diğer Âişe bt. Abdullah nâm hatunlardan ba‘de’l-istihbâr nefsimi âhara tezvîce kıbel-i şer‘den bana izin verilmek matlûbumdur dedikde hakīkat-ı hâl minvâl-ı meşrûh üzere olduğunu mezbûretândan her biri alâ-tarîkı’ş-şehâde ihbâr [43a] etmeğin ber-vech-i muharrer nefsini âhara tezvîce kıbel-i şer‘den mezbûre Âişe Hatun’a izin verildiğini mevlânâ-yı mezbûr mahallinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin hıfzan li’l-makāl mâ-vaka‘a bi’t-taleb ketb olundu. Fî 29 Cumâdelûlâ sene [1]143. Şuhûdü’l-hâl: İmâm es-Seyyid Hüseyin Efendi b. Veliyüddin, Müezzin Hasan Halîfe b. Hüseyin, Hüseyin b. Ahmed, el-Hâc Ali b. Ömer, el-Hâc Mustafa Ağa b. Ali, Salih Çelebi b. Süleyman.