Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 225 Hüküm no: 202 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Krece’nin ölen İşvetko v. Petko’nun vasisi olduğunu şahitlerle ispatladığı İsbât-ı vesâyet. Fi’l-asl vilâyet-i Rumeli’nde Kalkandelen kazâsına tâbi‘ Radoşte nâm karye ahâlîsinden olup Mahmiye-i İstanbul’da Hocapaşa Mahallesi’nde vâki‘ ekmekçi fırınında müsâfiren sâkin iken bundan akdem hâlik olan İşvetko v. Petko v. Krece’nin ber-vech-i âtî vasiyy-i muhtârı olduğunu iddi‘â eden bâ‘isü hâze’s-sifr Nikola v. Krece nâm zimmî meclis-i şer‘-i şerîf-i enverde Ananya v. İsayi nâm zimmî muvâcehesinde üzerine da‘vâ ve takrîr-i kelâm edip hâlik-i mezbûr hayâtında bi-emri’llâhi te‘âlâ helâkimde zimem-i nâsda ve sâir cemî‘ terekem ahz u kabz ve mikdâr-ı kifâye meblağ ile lâşem zîr-i zemîne ba‘de’l-ilkā düyûn-ı müsbetem ashâbına kazâ olundukdan sonra bâkī kalan terekem vârislerim olup karye-i mezkûrede sâkin karındaşlarıma irsâl ü îsâl ve teslîm oluna deyü vasiyyet ve tenfîzine beni vasiyy-i muhtâr nasb ve ta‘yîn eyledikde ben dahi kabûl eyledikden sonra mezbûr İşvetko musırran alâ-îsâ’ihî helâk olmağın hâlâ mezbûr Ananya’ya suâl olunup hâlik-i mezbûrun cihet-i karzdan zimmetinde hakkı olan bin akçeyi bana edâ ve teslîme tenbîh olunması bi’l-vesâye matlûbumdur dedikde gıbbe’s-suâl mezbûr Ananya cevâbında fi’l-vâki‘ hâlik-i mezbûra cihet-i karzdan zimmetinde bin akçe edâsı lâzım deyni olduğunu ikrâr lâkin müdde‘î-i mezbûrun ber-vech-i muharrer vasiyy-i muhtârı olduğunu inkâr edicek müdde‘î-i mezbûrdan müdde‘âsına mübeyyine beyyine taleb olundukda fi’l-asl karye-i mezkûre sâkinlerinden olup zikrolunan fırında sâkin İsmail Beşe b. Mehmed ile Yorgi v. Nedelko ve Petko v. Nedelko nâm zimmîler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka hâlik-i mezbûr İşveyko [İşvetko] v. Petko v. Krece bundan akdem hayâtında bi-emri’llâhi te‘âlâ hâlik olduğumda zimem-i nâsda ve sâir cemî‘ terekem ahz u kabz ve mikdâr-ı kifâye meblağ ile lâşem zîr-i zemîne ilkā düyûn-ı müsbetem ashâbına ba‘de’l-kazâ bâkī kalan terekem vârislerim olup mârru’z-zikr Radoşte karyesinde sâkin karındaşlarıma îsâl ve irsâl ve teslîm oluna deyü vasiyyet ve tenfîzine müdde‘î-i mezbûr Nikola’yı bizim huzûrumuzda vasiyy-i muhtâr nasb ve ta‘yîn eyledikde ol dahi vesâyet-i mezbûreyi ba‘de’l-kabûl musırran alâ-îsâ’ihî hâlik oldu müdde‘î-i mezbûr hâlik-i mezbûr İşvetko’nun ber-vech-i muharrer vasiyy-i muhtârıdır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe ri‘âyetihî şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 2 min-Cemâziyelâhir sene [1]143. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa, Abdullah b. Mustafa, Duhânî Mehmed b. Ahmed, Ya‘kub b. Abdullah.