Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 224 Hüküm no: 201 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un süknâsını ulemâya vakfettiği evinin Hafız Mehmed Efendi’ye tevcih olunduğu Merhûme Fâtıma nâm sâhibetü’l-hayrın süknâsı ulemâdan bir recül-i sâlihe meşrûta vakfı olup Mahmiye-i İstanbul’da Silahdâr Hayreddin Mahallesi’nde vâki‘ bir tarafdan ba‘zan Mustafa Çelebi tasarrufunda olan vakıf menzil [ve bazen] Hasebcizâdeler tasarrufunda olan vakıf menzil ve ba‘zan Davud Ağa tasarrufunda olan vakıf menzil ve bir tarafdan Müstadem Çavuş Vakfı odalar[ı] ve bir tarafdan İbrahim Çavuş veresesi tasarruflarında olan vakıf menzil ve bir tarafdan tarîk-i âm ile mahdûd tahtânî iki oda ve bir sofa ve kenîf ve bahçeyi muhtevî menzile tevcîh-i hâkimü’ş-şer‘le ber-mûceb-i şart-ı vâkıf[e] mutasarrıf olan Derzi Ali nâm kimesne fevt olup menzil-i mezbûr mahlûl olmağla süknâ-yı menzil-i mezbûr bundan akdem hilâf-ı şart-ı vâkıf[e] kādı-ı sâbık çukadârı Halil b. Hüseyin’e tevcîh etmekle ref‘ olunup süknâ-yı menzil-i mezkûr ulemâdan süknâya muhtâc ve min-külli’l-vücûh mahall ü müstahik idiği zeyl-i kitâbda muharrerü’l-esâmî Müslimîn haberleriyle müte‘ayyin olan işbu bâ‘isü’l-kitâb Hâfız Mehmed Efendi b. Mustafa’ya kıbel-i şer‘den ber-mûceb-i şart-ı vâkıf[e] tevcîh olunup tasarrufi’çün işbu vesîka ketb ve mezbûr Hâfız Mehmed Efendi yedine i‘tâ olundu. Fî-gurreti Cemâziyelâhir sene [1]143. Şuhûdü’l-hâl: Mustafa Efendi b. el-merhûm Yunus Efendi, Mehmed Ağa b. Mehmed Kethüdâ, Mehmed Çelebi b. Abdullah tahtacı, Mehmed b. Abdullah, Mehmed Efendi b. İbrahim, İbrahim b. Mustafa.