Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 227 Hüküm no: 204 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. İbrahim Bey ve kardeşi İsmail Çelebi’nin vefât eden Kudüs kadısı Ahmed Efendi’nin vârisi oldukları ve alacaklarını tahsil ettikleri Fi’l-asl Vilâyet-i Anadolu’da Ayıntab (Antep) kazâsı sükkânından olup hâlâ Mahmiye-i İstanbul’da Firuzağa Mahallesi’nde sâkin İsmail Çelebi b. ( ) karındaşı Ömer Çelebi b. İbrahim Bey meclis-i şer‘-i hatîr-i lâzımü’t-tevkīrde Mehmed Çelebi b. Abdullah mahzarında her biri üzerine takrîr-i da‘vâ ve tasvîr-i müdde‘â edip bizler bundan akdem Kuds-i şerîf kādısı iken fevt olan Ahmed Efendi b. el-Hâc Mustafa b. el-Hâc Mehmed’in li-ebeveyn er karındaşı müteveffâ-i mezbûr İbrahim Bey’in sulbî oğulları olup müteveffâ-i mezbûr Ahmed Efendi’nin verâseti zevce-i menkûha-i metrûkesi Hadice bt. Ali ile usûbet-i nesebiye cihetinden bizlere ve müteveffâ-i mezbûrun âhar karındaşı Mehmed’in oğlu Halil’e münhasıra olup müteveffâ-i mezbûr Ahmed Efendi’nin işbu Mehmed Çelebi zimmetinde cihet-i karz-ı şer‘îden yirmi guruş hakkı olmağla meblağ-ı mezbûrdan her birimizin hissesine isâbet eden beşer guruşdan ikimizin hissesine isâbet eden on guruşu mezbûr Mehmed Çelebi’den taleb eylediğimizde bizlere edâdan imtinâ‘ eder suâl olunup takrîrleri tahrîr ve meblağ-ı mezbûr on guruşun alıverilmesi bi’l-verâse matlûbumuzdur dediklerinde gıbbe’s-suâl mezbûr Mehmed Çelebi cevâbında müteveffâ-i mezbûr Ahmed Efendi’ye cihet-i mezkûreden yirmi guruş deyni olduğunu ikrâr lâkin müdde‘iyân-ı mezbûrân müteveffâ-i mezbûrun ber-vech-i meşrûh vârisleri olduğu ma‘lûmum değildir deyü inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda udûl-i ahrâr-ı ricâl-i Müslimînden olup yine kazâ-i mezbûr sükkânından es-Seyyid el-Hâc Yusuf Efendi b. es-Seyyid Yusuf ve el-Hâc Hasan b. Seydî nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘iyân-ı mezbûrân İsmail Çelebi ve Ömer Çelebi bundan akdem Kuds-i şerîf kādısı iken fevt olan Ahmed Efendi b. el-Hâc Mustafa b. el-Hâc Mehmed’in li-ebeveyn er karındaşı İbrahim Bey’in sulbî oğulları ve müteveffâ-i mezbûrun verâseti zevce-i menkûha-i metrûkesi Hadice bt. Ali ile müdde‘iyân-ı mezbûrâna ve müteveffâ-i mezbûrun âhar karındaşı Mehmed’in oğlu Halil’e münhasıradır ve mezbûrlardan gayrı vârisi olduğu ma‘lûmumuz değildir bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle olmağın mûcebince müdde‘iyân-ı mezbûrân İsmail Çelebi ve Ömer Çelebi’nin verâsetlerine ba‘de’l-hükm deyn-i mezbûr yirmi guruşdan müdde‘iyân-ı mezbûrânın hisselerine isâbet eden on guruşu mezbûrâna edâ ve teslîme mezbûr Mehmed Çelebi’ye ba‘de’t-tenbîh mezbûrân İsmail Çelebi ve Ömer Çelebi meclis-i şer‘de yine mezbûr Mehmed Çelebi muvâcehesinde her biri ikrâr ve takrîr-i kelâm edip meblağ-ı mezbûrdan edâsına tenbîh olunan on guruşu verâseten ve meblağ-ı bâkī on guruşu vekâleten mezbûr Mehmed Çelebi yedinden bi’t-tamam ve’l-kemâl ahz u kabz eyledik ba‘de’l-yevm meblağ-ı mezbûr yirmi guruşdan mezbûr Mehmed Çelebi zimmetinde nesne bâkī kalmamışdır dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 27 Cumâdelûlâ sene [1]143. Şuhûdü’l-hâl: Mehmed b. Abdullah, diğer Mehmed b. Abdullah, Mustafa Çelebi b. İbrahim, Mehmed Beşe b. Mustafa, Salih b. Süleyman.