Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 267 Hüküm no: 416 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir evin ortakları arasındaki anlaşmazlığın hassa mimarı ve mahkeme katibi tarafından keşfi Budur ki Hâssa bahçelerinden Fenerbahçesi demekle ma‘rûf bahçenin üstâdı olan kıdvetü’l-emâsil ve’l-akrân Hasan Usta b. Abdülmennân mahfil-i kazâya gelip takrîr-i kelâm ve ta‘bîr-i merâm eylediği mahrûse-i Üsküdar muzâfâtından Kadıköy nâm karyede vâki‘ inde’l-ahâlî ma‘lûmü’l-hudûd evimin karye-i mezbûreden Sofyani ve Marula bintey Nikola nâm zimmîyelerin müşterek evlerinden cânibinde olan iki kat bennâ zirâ‘ıyla tûlü on üç zirâ‘ duvarın tamâmında ikinci tabakaya varınca iki kat binâ olunup ve mezbûretân zimmîyeler ile müşterek olup ikinci tabakadan yukarı kendilere taraf olan yüzü hâlî üzre durup binâ olunmayıp ancak benim evimden tarafım olan yüzü bir kat binâ olunup ocak yeri dahi konup mezbûretân zimmîyelerin kat‘â alâkaları yok iken benim duvarımın üzerine ba‘zı kereste koymak ile ve kazıklar kakmak ile dahl ederler üzerine varılıp vukû‘ı üzre keşf olunmasın taleb ederim dedikde hâssa mi‘mârlardan Muslihiddin ve mahkeme kâtibi Mevlânâ Mehmed irsâl olunup vardıklarında mezbûre Sofyani fi’l-hakīka zikr olunan iki kat duvarın temelinden merkūm Hasan Usta ile müşterekiz deyicek mi‘mâr-ı mezbûr zikr olunan duvarın temelinden müşterek oldukları takdîrce ikinci tabakaya vardıkda mezbûretân Sofyani ve Marula’dan tarafa olan yüzü binâ olunmayıp mezbûr Hasan Usta’dan tarafa bir yüzü binâ olunup ve ocak yeri dahi olduğu Hasan Usta’nın müstakil mülkü olup mezbûretânın kat‘â medhalleri olmamağa delâlet eder ve mezbûrun duvarını isti‘mâl eylememek için kerpiç ile kendiler tarafa dolma duvar etmek lâzımdır dedikde mevlânâ-yı merkūm haber vermeğin bu hurûf tahrîr olundu. Tahrîren fî evâhiri Şa‘bân sene elf. Şuhûdü’l-hâl: Eynehan Üstâd-ı hadîka-i sultânî, Hızır b. Mahmud, Mustafa b. Abdullah, Arslan b. Pîr Ali, Bekir b. Abdullah ve gayruhüm