Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 269 Hüküm no: 420 Orijinal metin no: [39a(2)-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime bt. Abdullah’ın evinde hırsızlık yaptığını iddia ettiği Fatma bt. Abdullah’a açtığı davadan vazgeçtiği Mahrûse-i Üsküdar sâkinelerinden Sâime bt. Abdullah nâm hâtun mahfil-i kazâda yine mahrûse-i merkūmeden Fâtıma bt. Abdullah nâm hâtun mahzarında ikrâr ve takrîr-i merâm kılıp bundan akdem evim açılıp nice esbâb ve erzâkım sirkat olunup hâlâ mezbûrun yedinde bir kırmızı kemham bulup bi hasebi’ş-şer‘ sâbit edip kendiden gayrıların dahi istediğimde müslimûn-ı mutavassitûn mâ-beynimizi ıslâh edip bedel-i sulh bin üç yüz akçe verip ben dahi zikr olunan bedel-i sulhu alıp kabz edip sirkat da‘vâsından mezbûrenin zimmetini ibrâ’ ve ıskāt eyledim ba‘de’l-yevm benden veyâhud vekîlimden husûs-ı mezbûra müte‘allik da‘vâ sâdıra olursa lede’l-hükkâm istimâ‘ olunmaya dedikde mukırra-i mezbûrenin vech-i meşrûh üzre vâki‘ olan ikrârını mukarrun leha’l-merkūm vicâhen ve şifâhen tasdîk eylediği kayd olundu. Şuhûdü’l-hâl: Mehmed Subaşı an yayabaşıyân Dergâh-ı âlî, Fahrü’l-akrân Müstedâm Bey b. Abdülmüste‘ân, Mehmed b. Mustafa er-râcil, Mehmed b. Behrâm, İbrahim b. Mehmed, Mehmed b. Himmet, Muttalib b. Süleyman, Behrâm b. Abdullah er-râcil ve gayruhüm